एजेन्सी – जर्मन बुन्डेसलिगाको दोस्रो स्थानमा रहेको बोरुसिया डर्टमुन्डले घरेलु मैदानमा लज्जास्पद हार बेहोरेको छ । मुख्य फरवार्ड एर्लिङ ब्राउट हालान्डविना मैदान उत्रिएको डर्टमुन्डले बायर लिभरकुसनसँग ५–२ को लज्जास्पद हार बेहोरेको हो ।

सिग्नल इडुना पार्कमा आइतबार राति भएको खेलमा डर्टमुन्डलाई लज्जास्पद हार चखाउन फ्लोरिएन रिट्ज, रोबर्ट एन्डरिच, जोनाथन ताह र मोउसा डियावीले गोल गर्दा एक गोल उपहार पाएको थियो । घरेलु टोलीका स्टेफेन टिगेसले एक गोल गर्दा एक गोल उपहार पाएको थियो ।

खेलको १०औं मिनेटमा म्यानुएल एकान्जीको आत्मघाती गोलबाट लिभरकुसनले सुरुवाती अग्रता लिएको थियो । १६औं मिनेटमा जेरेमी फ्रिमपोङले पनि आत्मघाती गोल गरेपछि खेल १–१ गोलको बराबरीमा आएको थियो । तर, त्यसपछि डर्टमुन्ड सम्हालिन सकेन ।

२०औं मिनेटमा फ्लोरिएन रिट्जले करिम बेल्लारविको पासमा गोल गर्दै लिभरकुसनलाई २–१ को अग्रता दिलाए । २८औं मिनेटमा रोबर्ट एन्डरिचले फ्रिकिकमा सिधै गोल गर्दै बायर लिभरकुसनलाई पहिलो हाफमा ३–१ को अग्रता दिलाए ।

५३औं मिनेटमा जोनाथनले गोल गर्दै लिभरकुसनलाई फराकिलो जिततर्फ अग्रसर गराए । ८७औं मिनेटमा मौउसा डियावीले गोल गरेपछि लिभरकुसन खेलमा ५–१ ले अघि बढ्यो । ८९औं मिनेटमा स्टेफेन टिगेसले गोल गर्दै खेललाई ५–२ को अवस्थामा ल्याएपनि फराकिलो हार टार्न सकेन ।

यो हारसँगै डर्टमुन्ड शीर्षस्थानको बायर्न म्युनिखसँग ९ अंकले पछि परेको छ । डर्टमुन्डको ४३ तथा बायर्नको ५२ अंक छ । डर्टमुन्डलाई हराएको लिभरकुसन ३८ अंक जोडेर तेस्रोस्थानमा यथावत रहेको छ ।