एजेन्सी – साम्पडोरियामाथि जित निकाल्दै एसी मिलान इटालियन सिरी ‘ए’ को शीर्षस्थानमा उक्लिएको छ । मिलानले साम्पडोरियालाई १–० ले पराजित गर्दै शीर्षस्थानमा फर्किएको हो ।

मिलानोमा आइतबार राति भएको खेलमा मिलानको जितमा राफयल लियोले पहिलो हाफको शुरुमै गरेको गोल नै निर्णायक बन्यो । उनले आठौं मिनेटमा गोलरक्षक मिक मेइगननको लामो पासलाई नियन्त्रणमा लिदै गोल गरेका थिए ।

३८औं मिनेटमा कोन्टीको पासमा क्यानड्रेभाको प्रहारलाई मिलानका डिफेन्डरले क्लिय गर्दै बराबरी टारे । ४४औं मिनेटमा जुनियर मेसिएसको प्रहारलाई साम्पडोरियाका गोलरक्षक फाल्कोनले डाइभ दिदै बचाए । ६०औं मिनेटमा मिलान अग्रता दोब्बर पार्नबाट चुक्यो ।

एन्टी रेविचको प्रहार मागनानीले ब्लक गर्दा आएको बलमा ओलिभर जिरुडको भली प्रहारलाई गोलरक्षक फाल्कोनले बचाए । ७१औैं मिनेटमा रोमागनोलीको हेडरमा गोलक्षक फाल्कोन नै बाधक बने । त्यसपछि थप गोल निस्कन नसक्दा मिलान विजयी हुन सफल भयो ।

यो जितसँगै मिलानले एक खेल कम खेलेको इन्टर मिलान र समान खेल खेलेको नेपोलीलाई पछि पार्दै शीर्षस्थानमा उक्लन सफल भएको हो । शीर्षस्थानमा उक्लिएको मिलानको २५ खेलबाट ५५ अंक पुगेको छ । एक खेल कम खेलेको इन्टरको ५४ अंक रहेको छ । नेपोलीको ५३ अंक छ ।