एजेन्सी – विश्व फुटबलको सर्वोच्च निकाय फिफाले वर्तमान घटनाक्रमलाई मध्यनजर गर्दै रुसलाई अन्तर्राष्ट्रिय फुटबलमा प्रतिबन्ध लगाउने भएको छ ।

अन्तर्राष्ट्रिय ओलम्पिक कमिटी (आइओसी) ले रुस र बेलारुसका सबै खेलाडी र अफिसियललाई अन्तर्राष्ट्रिय प्रतियोगिता खेल्नमा प्रतिबन्ध लगाउन सिफारिस गरेसँगै फिफाले पनि प्रतिबन्ध लगाउने भएको हो । फिफाले अधिकारिक पुष्टि केहि समयमा नै गर्ने बुझिएको छ ।

फिफाको यस निर्णयसँगै रुसले अर्को महिना हुने विश्वकप छनोटको प्लेअफमा पनि सहभागिता जनाउन पाउने छैन । यसअघि फिफाले रुसले आफ्नो खेल फुटबल युनियन अफ रसियाको नाममा घरेलु मैदानमा खेल्न नपाउने निर्णय गरेको थियो । तर अधिकांश युरोपेली राष्ट्रले फिफाको यो निर्णयको आलोचना गरेपछि फिफाले प्रतिबन्ध नै गर्ने निर्णय लिएको हो ।

रुसले विश्वकप छनोटको प्लेअफमा पोल्यान्डको सामना गर्ने तालिका रहेको थियो । मार्च २९ मा हुने खेलमा अब पोल्यान्ड अघि बढ्ने सम्भावना छ । उक्त समूहको प्लेअफको अर्को खेलमा चेक र स्विडेन खेल्दैछन् ।

यूईएफएले यसअघि नै रुसमा हुने भनिएको च्याम्पियन्स लिगको फाइनल पेरिसमा सारिसकेको छ । यस्तै युरोपा लिगमा आरबी लाइप्जिग र रुसको स्पार्टाक मस्कोबिचको खेल पनि रद्द हुने आँकलन रहेको छ ।