काठमाडौं (हाम्रो खेलकुद) – रानीपोखरी कर्नर टिम (आरसिटी) ले सहिद स्मारक ‘बी’ डिभिजन लिगमा पहिलो जित निकाल्ने क्रममा मध्यपुर युथ एसोसिएसनमाथि सहज जित निकालेको छ । आरसिटीले मध्यपुरलाई २–० ले पराजित गरेको हो ।

आरसिटीको जितमा कप्तान अमर डंगोल र सागर बन्ठा थारुले गोल गरे । सातदोबाटोस्थित एन्फा कम्प्लेक्सको मैदानमा आइतबार भएको खेलको पहिलो मिनेटमा नै कप्तान अमरको गोलबाट आरसिटीले सुरुवाती अग्रता लिएको थियो । ८७औं मिनेटमा सागर बन्ठा थारुले गोल गर्दै आरसिटीलाई लिगमा पहिलो जित दिलाए ।

पहिलो जितसँगै आरसिटीले लिगमा ३ अंक जोडेको छ । आरसिटी पहिलो खेलमा खुमलटार युथ क्लबसँग ३–१ ले पराजित भएको थियो । मध्यपुरको यो पहिलो हार हो । यसअघि मध्यपुरले पहिलो खेलमा सामाजिक युथ क्लबलाई ५–२ ले पराजित गरेको थियो ।

यो नतिजासँगै मध्यपुर २ खेलबाट ३ अंक जोडेर छैटौं स्थानमा उक्लिएको छ । समान ३ अंक नै रहेपनि गोलअन्तरमा मध्यपुर चौथो स्थानमा रहेको छ ।

अर्काे खेलमा श्री कुमारी र सामाजिक युथ क्लबले ३–३ गोलको बराबरी खेल्दै अंक बाँडेका छन् । श्री कुमारीमा राज भुसाल, विपिन मगर र लक्ष्मण थारुले गोल गरे । सामाजिकका वसन्त बहादुर राना, कृष्ण भण्डारी र सुरेश खत्रीले गोल गरे ।

यो बराबरीसँगै श्री कुमारी २ खेलकाट २ अंक जोडेर नवौं स्थानमा रहेको छ । पहिलो अंक जोडेर सामाजिक १ अंक जोडेर १३औं स्थानमा रहेको छ ।

दिनकै पहिलो खेलमा आशिष चापागाईको दुई गोल मद्दतमा चर्च ब्वाइज युनाइटेडले खुमलटार युथ क्लबलाई २–० ले पराजित गर्दै शीर्षस्थानमा उक्लिन सफल भएको छ । चर्च ब्वाइजको दुई खेलबाट ६ अंक पुगेको छ । खुमलटार ३ अंक जोडेर पाँचौ स्थानमा रहेको छ ।