चितवन (हाम्रो खेलकुद) – महिला राष्ट्रिय लिगको विभागीय डर्वी भिडन्तमा नेपाल पुलिस क्लबले त्रिभुवन आर्मी फुटबल क्लबमाथि जित निकालेको छ । पुलिसले आर्मीलाई २–१ ले पराजित गरेको हो ।

चितवनको भरतपुरमा बुधबार भएको खेलमा पुलिसको जितमा निरु थापा र निर्मला उपाध्ययले गोल गरिन् । आर्मीकी पुनम जर्घा मगरले एक गोल फर्काए । खेलको १३औं मिनेटमा निरु थापाको गोलबाट पुलिसले सुरुवाती अग्रता लिन सफल भएको थियो । त्यसको एक मिनेट पछि नै निर्मला उपाध्ययले गोल गर्दै पुलिसको अग्रता दोब्बर पारिन् ।

६४औं मिनेटमा रश्मी कुमारी घिसिङ पेनाल्टीमा चुक्दा आर्मीले गोल अन्तर कम गर्नबाट चुक्यो । रश्मीको पेनाल्टीलाई पुलिसकी गोलरक्षक उषा नाथले बचाइन् । ७०औं मिनेटमा पुनम जर्घा मगरले गोल गर्दै खेललाई २–१ को अवस्थामा ल्याएपनि त्यसपछि थप गोल निस्कन नसक्दा आर्मी पराजित हुन पुग्यो ।

लिगमा आर्मीको यो दोस्रो हार हो । यसअघि आर्मीले पहिलो खेलमा एपिएफसँग २–१ कै हार भोगेको थियो । दोस्रो हार बेहोरेको आर्मी ३ खेलबाट ३ अंक जोडेर पाँचौ स्थानमा रहेको छ । आर्मीलाई हराएको पुलिस ३ खेलबाट ६ अंक जोडेर तेस्रो स्थानमा उक्लिएको छ शीर्षस्थानको धनगढी उपमहानगरपालिका र एपिएफसँग समान ६ अंक नै रहेपनि गोल अन्तरमा पुलिस पछि छ ।

बुधबार नै भएको लिगको अर्काे खेलमा चन्द्रपुर नगरपालिका रौतहट र विराटनगर महानगरपालिका मोरङले १–१ गोलको बराबरी खेल्दै अंक बाँडेका छन् । विराटनगरकी मीना खातुनले ४१औं मिनेटमा गोल गर्दा चन्द्रपुरकी रजनी थोकरले ५४औं मिनेटमा बराबरी गोल फर्काइन् ।
यो बराबरीसँगै विराटनगर ३ खेलबाट ४ अंक जोडेर चौथो स्थान रहेको छ । पहिलो अंक जोडेको चन्द्रपुर ३ खेलबाट १ अंक जोडेर सातौ स्थानमा रहेको छ ।