सुनिल गाउँले, सिमरा

विभागिय टोली एपिएफ फुटबल क्लब जगदम्बा १२औं जीतपुर सिमरा गोल्डकपको फाइनलमा प्रवेश गरेको छ । सिमरा रंगशालामा बिहीबार भएको दोस्रो सेमिफाइनलमा सर्लाहीको बागमती युवा क्लबाई ४–१ ले हराउँदै एपिएफ उपाधि नजिक पुगेको हो ।

एपिएफले उपाधिका लागि शनिबार अर्को ए डिभिजन टोली न्युरोड टिम (एनआरटी) को सामना गर्नेछ । आयोजकलाई ३–२ ले पराजित गर्दै एनआरटी फाइनल पुगेको थियो । एपिएफलाई फाइनल पुर्याउ अर्माण्ड बेडमले २ तथा सविन गुरुङ र प्रदीप लामाले समान १ गोल गरे । बागमतीका लागि अनिल राना मगरले गोल फर्काए ।

१२ औं मिनेटमा सविनको गोलबाट एपिएफले अग्रता लिएको थियो । पेनाल्टी बक्समा बागमतीको रक्षापंक्ती सम्हालिन नसक्दा सविनले प्रहार गरेको बलले सिधै जाली चुमेको थियो । बिएफसी चितवनलाई २–१ र साविक विजेता संकटा क्लबलाई १–० ले पराजित गर्दै सेमिफाइलको यात्रा तय गरेको बागमतीलाई उपाधि दाबेकारका रुपमा हेरिएको थियो । तर एपिएफविरुद्ध भने बागमती कमजोर देखियो ।

अर्माण्डले खेलको १६औं मिनेटमा एपिएफका लागि दोस्रो गोल गरेका थिए । सुरुवात देखिनै तालमेलको खोजीमा रहेको बागमतीविरुद्ध एपिएफले दबाब कायम राख्दै स्कोर निकालेको थियो । बागमतीले खेलको ३६औं मिनेटमा गोल गर्न अवसर गुमाएको थियो । कोएरा फ्लोरेन्टले मिलाएको पासलाई सदुपयोग गर्न दीपेश चाम्लिङ राई चुके । पेनाल्टी बक्स भित्र पाएको अवसर सदुपयोग गर्न दीपेश असफल भए । उनको प्रहार क्रसबार माथीबाट बाहिरियो ।

त्यसलगत्तै बनाएको अर्को अवसरमा भने बागमतीले सफलता प्राप्त गर्यो । अनिलले उत्कृष्ट गोल गर्दै बागमतीलाई खेलमा फर्काउने प्रयास गरे । उनको प्रहारलाई नियन्त्रणमा लिन एपिएफका गोलरक्षक राजु नगरकोटी असफल भए । हिमालयन शेर्पाविरुद्ध ३–२ को जित निकाल्दै सेमिफाईनल प्रवेश गरको एपीएफले पहिलो हाफको ईन्जुरी समयमा पाएको पेनाल्टी अवसर सदुपयोग गर्न सकेन । बागमतीबाट खेलेका थ्रिस्टारका गोलरक्षक प्रिसोले बिके तामाङलाई लडाएपछि रेफ्री प्रकाशननाथ श्रेष्ठले एपिएफलाई पेनाल्टी अवसर दिएका थिए । पेनाल्टीमा एपिएफका आभाष लामिछाने गोल गर्न चुके । उनको प्रहार प्रिसोले उत्कृष्ट बचाउ गरे ।

पेनाल्टीमार्फत अग्रता बढाउने अवसर गुमाएको एपिएफले खेलको ७९औं मिनेटमा तेस्रो गोल गरेको थियो । अर्माण्डले हेडमार्फत गोल गरेका थिए । दोस्रो हाफमा सुधारिएको प्रदर्शन गरेपनि फिनिसिङमा चुकेको बागमतीले खेलको ८३औं मिनेटमा चौथोको सामना गर्यो । प्रदीपले पेनाल्टी बक्स भित्र प्राप्त बललाई गोलमा परिणत गरेका थिए । प्रदीप खेलको म्यान अफ दि म्याच घोषित भए र उनले ५ हजार रुपैयाँ प्राप्त गरे ।