एजेन्सी – निकोलो जानिओलोको ह्याट्रिक सहयोगमा इटालियन क्लब रोमाले युरोपा कन्फ्रेन्स लिगमा सानदार जित निकाल्दै सेमिफाइनलमा स्थान बनाउन सफल भएको छ ।

पहिलो लेगमा २–१ ले पछि रहेको रोमाले घरेलु मैदानमा भएको दोस्रो लेगमा ४–० को सानदार जित तथा समग्रमा ५–२ को जित निकाल्दै सेमिफाइनलमा पुग्न सफल भएको हो ।

रोमामा बिहीबार राति भएको दोस्रो लेगमा रोमाको जितमा निकोलो जानिओलोले ह्याट्रिक पुरा गर्दा ट्याम्मी अब्राहमले एक गोल थपे । खेलको पाँचौ मिनेटमा ट्याम्मी अब्राहमको गोलबाट रोमाले सुरुवाती अग्रता लियो । २३औं मिनेटमा निकोलोले गोल गर्दै रोमाको अग्रता दोब्बर पारे ।

२९औं मिनेटमा निकोलोले व्यक्तिगत दोस्रो तथा टोलीका लागि तेस्रो गोल गरेपछि रोमा खेलमा ३–० ले अघि बढ्यो । ४९औं मिनेटमा निकोलोले ह्याट्रिक पुरा गर्दै रोमालाई सानदार जित दिलाए ।

युरोपा कन्फ्रेन्स लिगकै अर्काे खेलमा एक गोलले पछि परेको स्थिति उल्ट्याएर इंग्लिस क्लब लेस्टर सिटीले डच क्लब पिएसभी इन्डोभेनमाथि २–१ को पूनरागमन जित निकाल्दै सेमिफाइनलमा पुग्न सफल भएको छ । पहिलो लेग गोलरहित बराबरीमा सकिएको थियो । लेस्टरका जेम्स म्याडिसन र रिकार्डाे पेरेइराले गोल गर्दा पिएसभी इन्डोभेनका इरान जाहवीको गोल सान्त्वना बन्यो ।

यस्तै फ्रान्सेली क्लब मार्से र डच क्लब फियनुर्डले पनि अन्तिम चारमा स्थान पक्का गरेका छन् । मार्सेले ग्रीसको पाओकलाई १–० ले तथा समग्रमा ३–१ ले तथा फियनुर्डले दोस्रो लेगमा ३–१ ले तथा समग्रमा ६–४ को जित निकाल्यो ।