काठमाडौं (हाम्रो खेलकुद) – सैनिक जनसम्पर्क तथा सुचना निर्देशनालयको स्थापना दिवशको अवसरमा आयोजित मैत्रीपूर्ण फुटबलमा जनसम्पर्क तथा सुचना निर्देशनालयको टोलीले रक्षा संवाददातालाई पराजित गरेको छ ।

सैनिक मैदानमा सोमबार भएको खेलमा सेनाको टोलीले पत्रकारलाई ७–५ गोल अन्तरगतले पराजित गरेको छ। खेलको सुरुवातमा पत्रकारको टिमले ४–१ को अग्रता लिएपनि सेनाले पूनरागमन गर्दै जित निकाल्न सफल भएको हो ।

सेनाका लागि सेनानी विदुरध्वज अधिकारी र सेनानी सौगात सिंह राठौरले समान २ गोल गरे। महासेनानी सरोजकुमार अधिकारी, सहसेनानी सञ्जय शिलवाल र सिपाही धर्मराज छालाले समान एक गोल गरे । पत्रकारका लागि अभिनव जोशीले ४ गोल र कप्तान उजिर कार्कीले १ गोल गरे। जोशीले पहिलो हाफमै ह्याट्रिक पूरा गरे पनि हारबाट जोगाउन सकेनन्।

२०५८ सालमा चैत २० गते जनसम्पर्क तथा सुचना निर्देशनालयको स्थापना भएको थियो। मंगलबार २१औं स्थापना दिवशका अवसरमा भएका विभिन्न कार्यक्रमको समापन गरिएको थियो । जंगी अड्डास्थित सभामण्डलमा प्रधानसेनापति प्रभुराम शर्माले विभिन्न प्रतियोगिताका विजेतालाई पुरस्कार वितरण गरेका छन्।

स्थापना दिवशमा नेपाली सेना लघु चलचित्र, फोटो प्रतियोगिता, फोटो तथा विभिद प्रदर्शनी, सिपाही २०७८ र शिवपुरी जर्नल २०२२ का उत्कृष्ठ लेखलाई पुरस्कृत गरिएको छ।