धनगढी (हाम्रो खेलकुद) – दुई विभागिय टोली नेपाल पुलिस क्लब क्लब र एपिएफबीच कैलालीको धनगढीमा जारी प्रथम राष्ट्रिय मुख्यमन्त्री विवाइसी महिला गोल्डकप फुटबल प्रतियोगिताको उपाधिका लागि प्रतिस्पर्धा हुने भएको छ ।

प्रतियोगिताको छैटौं दिन बिहीबार दोस्रो सेमिफाइनलमा आयोजक वनदेवी युवा क्लब (विवाइसी) लाई ३–० ले हराउँदै पुलिसले एपिएफसँगको भेट पक्का गरेको हो । अर्को विभागिय टोली त्रिभुवन आर्मी क्लबलाई हराउँदै एपिएफ उपाधि नजिक पुगेको थियो । धनगढी रंगशालामा पुलिसलाई जित दिलाउँन निर्मला विकले २ गोल र अर्को गोल रेखा पौडेलले गरिन् ।

पहिलो हाफ गोल रहित बराबरीमा टुंगिएको खेलको दोस्रो हाफको सुरुवातमै पुलिसले अग्रता लिएको थियो । ४९ औं मिनेटमा निर्मलाले गोल गर्दै पुलिसलाई अग्रता दिलाइन् । ५६ औं मिनेटमा रेखाले गोल गर्दै अग्रता दोब्बर पारिन् । खेलको ६५ औं मिनेटमा निर्मलाले अर्को गोल गरेपछि पुलिस फाइनलतर्फ अघि बढेको थियो । प्लेयर अफ द म्याच चुनिएकी पुलिसकी निर्मलाले ५ हजार रुपैयाँ सहित ट्रफी प्राप्त गरिन् ।

एपिएफ र पुलिसबीच फाइनल शनिबार साँझ साढे ६ बजे सुरु हुने आयोजकले जनाएको छ । ८ टोलीको सहभागिता रहेको प्रतियोगिताको विजेताले उपाधिसहित ५ लाख रुपैयाँ र दोस्रो टोलीले २ लाख ५० हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले ५० हजार र विधागत उत्कृष्ट खेलाडीले समान १० हजार रुपैयाँ प्राप्त गर्नेछन् । सुदूरपश्चिम प्रदेश खेलकुद परिषद् प्रतियोगिताको मुख्य प्रबद्र्धक रहेको छ ।