एजेन्सी – ला लिगा प्रतिद्धन्द्धी भ्यालेन्सियालाई टाइब्रेकरमा पराजित गर्दै रियल बेटिस १७ वर्षपछि स्पेनिस कोपा डेल रेको च्याम्पियन बनेको छ ।

शनिबार राति भएको फाइनलमा भ्यालेन्सियालाई टाइब्रेकरमा ५–४ ले पराजित गर्दै बेटिसले उपाधि जित्न सफल भएको हो । निर्धारित समयको खेल १–१ गोलको तथा अतिरिक्त समयमा पनि गोल निस्कन नसकेपछि खेलको निर्णय टाइब्रेकरबाट लिइदा रियल बेटिसले बाजी मारेको हो ।

टाइब्रेकरमा रियल बेटिसका सबै पाँच खेलाडीले गोल गर्दा भ्यालेन्सियाको एक प्रहारले पोस्टको दिशा लिन सकेन । रियल बेटिसका विलियम जोश, जोआक्विन, आन्द्रेस गुआरडाडो, क्रिस्टियन टेलो र जुआन मिरान्डाले गोल गरे । भ्यालेन्सियाका कार्लाेस सोलेर, युरोस रासिस, गोन्कालो गुइडेस र जोस गायाले गोल गर्दा युनुुस मुसाहाले गोल गर्न सकेनन् ।

त्यसअघि सेभिलमा भएको खेलको ११औं मिनेटमा बोर्जा इग्लिसिएसले गोल गर्दै बेटिसलाई सुरुवाती अग्रता दिलाएका थिए । ३०औं मिनेटमा ह्युगो डुरोले बराबरी गोल फर्काए । त्यसपछि थप गोल निस्कन नसक्दा खेल अतिरिक्त समय हुँदै टाइब्रेकरमा लम्बिएको थियो ।

पाँचपटक फाइनल खेल्दा तेस्रोपटक च्याम्पियन बनेको बेटिसले सन् २००५ पछि पहिलोपटक उपाधि जितेको हो । रियल बेटिसले यसअघि १९३१, १९७६–७७, १९९६–९७ र २००४–०५ को सिजनमा फाइनल खेलेको थियो । १९७६–७७ र २००४–०५ को सिजनमा उपाधि जितेको थियो ।