एजेन्सी – दुई गोलको अग्रता जोगाउन नसक्दा लन्डन क्लब चेल्सी इंग्लिस प्रिमियर लिगमा बराबरीमा रोकिएको छ । चेल्सीले घरेलु मैदानमा अन्तिम समयमा सम्हालिन नसक्दा वल्भ्ससँग २–२ गोलको बराबरी खेल्दै अंक बाड्न बाध्य बनेको हो ।

चेल्सीका लागि रोमेलु लुकाकुको दुई गोल गरेपनि जितको लागि पर्याप्त भएन । वल्भ्सका ट्रिन्काओ र कोनर कोडेले गोल गर्दै चेल्सीबाट अंक खोस्न सफल भए ।

स्टामफोर्ड ब्रिजमा शनिबार राति भएको खेलको ३८औं मिनेटमा रुवेन लफटस चिकले गोल गरेपनि भिएआरबाट मान्यता नपाउँदा चेल्सीले अग्रता लिन सकेन । ५६औं मिनेटमा लुकाकुले पेनाल्टीमा गोल गर्दै चेल्सीलाई सुरुवाती अग्रता दिलाए । लगत्तै ५८औं मिनेटमा लुकाकुले गोल गर्दै चेल्सीलाई २–० ले अघि बढाए ।

७९औं मिनेटमा ट्रिन्काओले चिक्विन्होको पासमा गोल गर्दै वल्भ्सलाई खेलमा फर्कने संकेत दिए । बराबरीतर्फ धकेलिएको खेलको इन्ज्युरी समयको थप गरिएको सातौं मिनेटमा कोनर कोडेले गोल गर्दै चेल्सीलाई जितबाट वञ्चित गराए ।

यो बराबरीसँगै चेल्सी ३५ खेलबाट ६७ अंक जोडेर तेस्रो स्थानमा यथावत रहेको छ । वल्भ्स ५० अंक जोडेर आठौं स्थानमा रहेको छ ।

अर्काे खेलमा क्रिस्टल प्यालेसँग १–० ले पराजित हुँदै वाट्फोर्ड रेलिगेसनमा परेको छ । वाट्फोर्डको ३५ खेलबाट २२ अंक रहेको छ । अब बाँकी रहेको तीन खेलमा सफलता हात पारेपनि वाट्फोर्डलाई केही हुनेछैन । नर्विच सिटी पनि रेलिगेसनमा परिसकेको छ ।

अन्य नतिजा
ब्रेन्टफर्डविरुद्ध साउथह्याम्टन (३–०), बर्नलेविरुद्ध एस्टन भिल्ला (१–३), ब्राइटनविरुद्ध म्यानचेस्टर युनाइटेड (४–०) र लिभरपुलविरुद्ध टोटेनहम (१–१)