काठमाडौं (हाम्रो खेलकुद) – एएफसी एसियन कप २०२३ को छनोट चरणका लागि बन्द प्रशिक्षणमा रहेका नेपाली राष्ट्रिय फुटबल टोलीले क्यामरुनको एभेनिर एफसी डोउलामाथि सानदार जित निकालेको छ ।

त्रिपुरेश्वरस्थित दशरथ रंगशालामा मंगलबार भएको खेलमा नेपालले एभेनिरमाथि ४–१ को फराकिलो जित निकालेको हो । नेपालको जितमा जर्जप्रिन्स कार्कीले दुई गोल तथा मनिष डाँगी र दर्शन गुरुङले समान गोल गरे ।

एभेनिरमाथि नेपालले तेस्रो अभ्यास खेलमा जित निकाल्न सफल भएको हो । यसअघिको दुई खेल गोलरहित बराबरीमा सकिएको थियो ।

बन्द प्रशिक्षणमा रहेका सिनियर १० खेलाडी, व्यवस्थापन र मुख्य प्रशिक्षकबीचको विवादपछि हाल राष्ट्रिय टोलीमा नयाँ र युवा खेलाडीहरु रहेका छन् । सिनियर १० खेलाडीले क्याम्प छोड्न बाध्य भएपछि प्रशिक्षक अब्दुल्लाह अलमुताइरीले १७ नयाँ खेलाडीलाई टोलीको प्रशिक्षणमा समेटेको थियो ।

त्यसमध्ये गोलरक्षक विकेश कुथु सुरुवातमै अनुपस्थित रहे । त्यसपछि भारतीय सेनामा कार्यरत भविन्द्र मल्ल ठकुरीले पनि केही दिन प्रशिक्षणमा जोडिदै प्रशिक्षक र खेलाडीबीचको विवादमा नपर्ने भन्दै क्याम्प छाडिसकेका छन् ।

थप अभ्यास र प्रशिक्षणका लागि नेपाली टोली यसै साता कतार जाने सम्भावना छ । त्यहाँ नेपाली टोलीले अफगानिस्तानसँग मे २५ र २९ मा दुई मैत्रीपूर्ण खेल खेल्ने तालिका छ ।

एएफसी एसियन कप छनोटमा समूह ए मा रहेको नेपालले आयोजक कुवेत, जोर्डन र इन्डोनेसियासँग प्रतिस्पर्धा गर्नेछ । ८ जुनमा जोर्डन, ११ जुनमा कुवेत र १४ जुनमा इन्डोनेसियासँग खेल्ने तालिका छ ।