काठमाडौं (हाम्रो खेलकुद) – विभागीय टोली नेपाल पुलिस क्लबलाई स्तब्ध पार्दै स्थानिय टोली विजय युथ क्लब हेटौंडामा जारी चौथो स्थानीय तह सहिद स्मृति अन्तर्राष्ट्रिय मकवानपुर गोल्डकप फुटबल प्रतियोगिताको फाइनलमा प्रवेश गरेको छ ।

पुलिसलाई १–० ले पराजित गर्दै विजय युथले फाइनलमा स्थान पक्का गरेको हो । विजय युथलाई फाइनलमा पु¥याउन पेपेले गरेको गोल नै निर्णायक बन्यो ।

अमिर श्रेष्ठको कर्नरलाई अनमार्क रहेका पेपेले आफ्नो अग्ला कदको फाइदा उठाउँदै हेडमार्फत गोल गर्न सफल भएका थिए । त्यसपछि थप गोल निस्कन नसक्दा विजय युथ विजयी हुँदै फाइनलमा पुग्न सफल भयो ।

अब विजय युथले उपाधिका लागि सोमबार त्रिभुवन आर्मी क्लब र क्यामरुनको एभेनिर एफसी डोउलाबीचको विजेतासँग खेल्नेछ । आर्मी र एभेनिरबीचको खेल शनिबार हुँदैछ ।

विजय युथका गोलकर्ता पेपे म्यान अफ द म्याच घोषित भए । उनले नगद १० हजारसहित ट्रफी हात पारे । १२ टोलीहरुको सहभागिता रहेको प्रतियोगिताको फाइनल जेठ ३० मा हुनेछ ।

मकवानपुर जिल्ला फुटबल संघको आयोजनामा जारी प्रतियोगिताको विजेताले उपाधिसहित नगद १५ लाख हात पार्नेछ । दोस्रो हुनेले १० लाख प्राप्त गर्नेछ । प्रतियोगिताको सर्वाेत्कृष्ट खेलाडीले हेटौंडा स्कुल अफ म्यानेजमेन्टले प्रायोजन गरेको एक थान बुलेट मोटरसाइकल हात पार्नेछ । व्यक्तिगत विधाका उत्कृष्टले जनही २५ हजार ट्रफी प्राप्त गर्नेछ ।