एजेन्सी – युइएफए नेसन्स लिग ए ग्रुप १ मा डेनमार्कले सहज जित निकालेको छ । घरेलु मैदानमा डेनमार्कले अष्ट्रियामाथि २–० को सहज जित निकालेको हो ।

कोपेनहेगनमा सोमबार राति भएको खेलमा घरेलु टोलीको सहज जितमा जोनास वाइन्ड र एन्ड्रिएस स्कभ ओल्सेनले गोल गरे । दुवै गोल पहिलो हाफमा भएको थियो ।

खेलको २१औं मिनेटमा जोनास वाइन्डको गोलबाट डेनमार्कले सुरुवाती अग्रता लिएको थियो । उनले जोआकिमको पासमा गोल गर्न सफल भएका थिए । ३७औं मिनेटमा एन्ड्रिएस स्कभ ओल्सेनले गोल गर्दै डेनमार्कको अग्रता दोब्बर पारे । उनले जोनास वाइन्डको पासमा गोल गर्न सफल भएका थिए ।

त्यसपछि दोस्रो हाफमा दुवै टोलीबाट कुनै गोल निस्कन नसक्दा पहिलो हाफको गोल नै डेनमार्कको जितमा पर्याप्त बन्यो । यो जितसँगै डेनमार्क ४ खेलबाट ९ अंक जोडेर शीर्षस्थानमा रहेको छ । टोलीले नेसन्स लिगको अन्तिम चारमा छनोट हुने सम्भावना बलियो बनाएको छ । पराजित अष्ट्रिया ४ अंक जोडेर तेस्रो स्थानमा रहेको छ ।

यही समूहको अर्काे खेलमा क्रोएसियाले फ्रान्सलाई १–० ले पराजित गरेको छ । क्रोएसियाको जितमा पाँचौ मिनेटमा कप्तान लुका मोड्रिचले गरेको गोल नै निर्णायक बन्यो ।

यो नतिजापछि क्रोएसिया ७ अंक जोडेर दोस्रो स्थानमा रहेको छ । फ्रान्स २ अंक जोडेर पुछारमा रहँदै रेलिगेसनमा पर्ने सम्भावना बढेको छ ।