एजेन्सी – युइएफए नेसन्स लिग ए ग्रुप ३ मा इंग्ल्यान्डले घरेलु मैदानमा लज्जास्पद हार बेहोरेको छ । इंग्ल्यान्डले हंगेरीसँग ४–० को लज्जास्पद हार बेहोरेको हो ।

वल्भरह्याम्टनमा १० खेलाडीमा समेटिएको घरेलु टोलीलाई लज्जास्पद हार चखाउन रोलान्ड सल्लाईले दुई तथा जिसल्ट नागी र ड्यानियल गजडगले समान एक गोल गरे ।

खेलको १६औं मिनेटमा रोलान्ड सल्लाईले गोल गर्दै हंगेरीलाई सुरुवाती अग्रता दिलाए । उनले एडाम लाङको पासमा गोल गर्न सफल भएका थिए । ७०औं मिनेटमा रोलान्ड सल्लाईले मार्टिन एडामको पासमा व्यक्तिगत र टोलीको लागि दोस्रो गोल गरेपछि बेल्जियम खेलमा २–० ले अघि बढ्यो ।

८०औं मिनेटमा जिसल्ट नागीले गोल गरेपछि हंगेरी घरेलु टोलीविरुद्ध सहज जिततर्फ अग्रसर बन्यो । उनले मार्टिन एडामकै पासमा गोल गर्न सफल भयो । ८२औं मिनेटमा घरेलु टोली इंग्ल्यान्ड १० खेलाडीमा समेटिन पुग्यो ।

जोन स्टोन्स दोहोरो पहेलो कार्ड खाँदै मैदानबाट बाहिरिएपछि टोली झनै समस्यामा परेको थियो । त्यसपछि ८९औं मिनेटमा ड्यानियल गजडगले एडाम नागीको पासमा गोल गर्दै घरेलु टोलीलाई फराकिलो हार चखाए ।

यो जितसँगै हंगेरी ४ खेलबाट ७ अंक जोडेर शीर्षस्थानमा उक्लिएको छ । पराजित इंग्ल्यान्ड २ अंक जोडेर पुछारमा रहेको छ । जर्मनीको ६ तथा इटालीको ५ अंक छ ।