एजेन्सी – इंग्लिस क्लब म्यानचेस्टर युनाइटेड जाने चर्चाकाबीच फ्रान्सेली मिडफिल्डर फरवार्ड क्रिस्टोफर एनकुन्कुले जर्मन क्लब आरबी लाइप्जिगसँग सम्झौता नविकरण गरेको छ ।

म्यानचेस्टर युनाइटेड जाने चर्चाकाबीच एनकुन्कुले लाइप्जिगमा थप दुई वर्षको सम्झौता नविकरण गरेका हुन् । अब उनी २०२६ सम्म लाइप्जिगमा हुनेछ ।

२४ वर्षीय मिडफिल्डर फरवार्ड युनाइटेडसँगै अर्काे इंग्लिस क्लब चेल्सीसँग जोडिएको थियो । तर, उनले लाइप्जिग नै रोजेका हुन् । गत सिजन क्लबको प्लेयर अफ दि सिजन भएका उनले लाइप्जिगलाई जर्मन कप जिताउन महत्वपूर्ण भुमिका निभाएको थियो ।

‘म लाइप्जिगको जर्सी लगाएर खेल्न पाँउदा खुशी छु । मलाई राख्न क्लबको प्रयासबाट म साँच्चै प्रभावित भए ।’ सम्झौता नविकरणसँगै एनकुन्कुले भने, ‘जर्मन कप जित्नु हाम्रो लागि ठुलो उपलब्धि हो । यो स्पष्ट छ कि यहाँ मेरो कथा सकिएको छैन । हामी थप उपाधि चहान्छौं ।’

उनले थपे, ‘आरबी लाइप्जिगले हालैका वर्षमा अन्तर्राष्ट्रिय मञ्चमा आफ्नो नाम कमाएको छ र हामीले उपाधिका लागि प्रतिस्पर्धा गर्न सक्छौं भनेर बारम्बार देखाएका छन् । हामी यसलाई अगाडि बढाउन र एक कदम अगाडि बढ्न चाहन्छौं ।’

एनकुन्कुले गत सिजन बुन्डेसलिगाको ३४ खेलमा २० गोल र १४ असिस्ट दिएका थिए । उनले समग्रमा लाइप्जिगका लागि ५२ खेलमा ३५ गोल गरेका छन् । टोली गत सिजन बुन्डेसलिगामा चौथो स्थानमा रहेको थियो ।

फ्रान्सको उमेर समूह हुँदै सिनियर टोलीमा स्थान बनाइसकेका एनकुन्कु सन् २०१९–२० को सिजनमा फ्रान्सेली क्लब पिएसजीबाट लाइप्जिग पुगेका थिए ।