एजेन्सी – इंग्लिस क्लब चेल्सीले पनि पोर्चुगिज फरवार्ड क्रिस्टियानो रोनाल्डोलाई अनुबन्ध नगर्ने निर्णय लिएको छ । क्लबले म्यानचेस्टर सिटीका विंगर रहिम स्टर्लिङलाई अनुबन्ध गर्दै रोनाल्डो भित्र्याउन सम्भावनामा पूर्णविराम लगाएको हो ।

यसअघि क्लबका नयाँ मालिक टड बोहलीसँग रोनाल्डोका एजेन्टले छलफल गरेका थिए । बोहली पनि चेल्सीमा आगमनपछि सुपरस्टार अनुबन्धनका रुपमा रोनाल्डो भित्र्याउन चाहन्थे । तर प्रशिक्षक थोमस टुचेलले रोनाल्डो अनुबन्धन नगर्न सुझाव दिएपछि क्लबले स्टर्लिङलाई रोजेको हो । टुचेलले ३७ वर्षीय रोनाल्डो आफ्नो योजनामा नअट्ने बताएका थिए ।

यसअघि रोनाल्डोका एजेन्ट जोर्गे मेन्डेसले बायर्न म्युनिखसँग पनि ट्रान्सफरबारे छलफल गरेका थिए । सुरुवातमा दुई क्लबबीच छलफल भएपनि अन्त्यमा बायर्न पछि हटेको थियो । बायर्नका बोर्ड सदस्य तथा पूर्व गोलरक्षक ओलिभर कानले सार्वजनिक रुपमा यसको खुलासा गरेका थिए ।

‘मलाई रोनाल्डो मनपर्छ । उनी इतिहासकै उत्कृष्ट खेलाडीमा पर्छन् । तर उनको उमेर ३७ वर्ष पुगेको छ । हाम्रो क्लबको सिद्धान्त अनुसार उनलाई अनुबन्ध गर्नु ठिक हुँदैन,’ कानले भनेका थिए ।

रोनाल्डोलाई युरोपका दुई ठूला क्लबले अनुबन्ध गर्न अस्विकार गर्दा उनी युनाइटेड नै बस्ने सम्भावना बढेको छ । त्यसो त क्लबका नयाँ प्रशिक्षक एरिक टेन हागले रोनाल्डो आफ्नो योजनामा अटाउने यसअघि नै प्रष्ट पारिसकेका छन् । यसबाहेक रोनाल्डोलाई साउदी अरबबाट पनि निकै ठूलो रकमसहितको प्रस्ताव आएको छ ।

पोर्चुगलको सीएनएनले रोनाल्डोलाई साउदी अरबको एक क्लबले ३ सय मिलियन युरोको प्रस्ताव राखेको खबर आएको छ । नाम खुलासा नभएको उक्त क्लबले ३० मिलियन ट्रान्सफर रकम स्वरूप म्यान्चेस्टर युनाइटेडलाई, २ सय ५० मिलियन रोनाल्डोलाई दुई वर्षको तलब स्वरूप र २० मिलियन रोनाल्डोको एजेन्ट समुहलाई दिने प्रस्ताव गरेको बुझिएको छ ।

रोनाल्डो भने व्यक्तिगत रुपमा कम्तिमा यो सिजन युरोपको शीर्ष लिग नै खेल्न चाहन्छन् । यसै वर्षको अन्त्यमा हुने फिफा विश्वकप २०२२ कतारका लागि उनी उच्च लयमा खेलिरहन चाहेका छन् । त्यसैले पनि रोनाल्डोले यस सिजन उक्त प्रस्ताव नकार्ने सम्भावना छ । तर दुई सिजनको २ सय ५० मिलियन रकम निकै ठूलो हो । हाल रोनाल्डोले युनाइटेडबाट वार्षिक ३२ मिलियन युरो मात्र बुझ्ने गरेका छन् ।

म्यानचेस्टर युनाइटेड प्रि-सिजन टुरमा रहँदा रोनाल्डो भने क्लबसँग समझदारीका कारण अझै प्रशिक्षणमा उपस्थित भएका छैनन् । क्लबले उनलाई पारिवारिक कारण देखाउँदै थप बिदा बस्न स्वीकृति दिएको छ । क्लबका नवनियुक्त प्रशिक्षक एरिक टेन हागले रोनाल्डोसँग छलफल भएको बताउँदै आफ्नो योजनामा राखेको बताएका छन् । तर रोनाल्डो यसबारे मौन छन् ।

रोनाल्डो युरोपमा अझ एक सिजन च्याम्पियन्स लिग खेल्न चाहन्छन् । गत सिजन युनाइटेडको बिर्सनलायक प्रदर्शनपछि क्लब युरोपा लिगमा खुम्चिएको छ । त्यसैले पनि रोनाल्डो अन्यत्र भविष्य खोजिरहेका छन् । तर ३७ वर्षीय रोनाल्डोमा जोखिम लिन शीर्ष क्लब तयार छैनन् ।