एजेन्सी – इंग्लिस प्रिमियर लिग क्लब चेल्सीले इटालियन क्लब नेपोलीबाट डिफेन्डर कालिडु कौलीबालीलाई अनुबन्ध गरेको छ । चेल्सीले सेनेगलको कप्तान समेत रहेका ३१ वर्षीय डिफेन्डरलाई चार वर्षको सम्झौता गरेर भित्र्याएको हो ।

सन् २०१४ मा बेल्जियमको जेन्कबाट नेपोली आएका कौलीबालीले ३ सय १७ खेल खेले । चेल्सीले लामो समयदेखि उनलाई पछ्याइरहेको थियो । गत सिजनको अन्त्यसँगै टोलीका दुई मुख्य डिफेन्डर एन्टोनियो रुडीगर र आन्द्रिएस क्रिस्टेन्सन बाहिरीएपछि चेल्सीले सेनेगलको राष्ट्रिय टोलीबाट खेलिरहेका डिफेन्डर कौलीबाली अनुबन्धन गरेको हो । कौलीबाली अनुबन्धनमा चेल्सीले ४० मिलियन युरोको हाराहरीमा खर्च गरेको चर्चा छ ।

कौलीबालीले सन् २०१५ मा सेनेगलको राष्ट्रिय टोलीबाट खेलेका थिए । उनले त्यसयता ६२ खेल खेलेका छन् । सन् २०२१ को अफ्रीका कप अफ नेसन्स जित्दा उनी नै टोलीका कप्तान थिए । चेल्सीमा टड बोहली आएयता कौलीबाली अनुबन्धित हुने दोस्रो खेलाडी बनेका छन् । यसअघि क्लबले ५० मिलियन पाउण्ड खर्चेर म्यानचेस्टर सिटीका रहिम स्टर्लिङ अनुबन्ध गरेको थियो ।

कौलीबालीले चेल्सीमा अनुबन्धित हुन पाउँदा खुसी व्यक्त गरे । ‘चेल्सी ठुलो टिम हो । प्रिमियर लिग खेल्ने मेरो सपना थियो । सन् २०१६ मा पनि चेल्सीले भित्र्याउन चाहेको थियो, तर सम्भव भएन । अहिले जब क्लबले प्रस्ताव राख्यो, मैले यहाँ खेल्न चाहेको कारण नै स्वीकार गरें,’ उनले भने ।

‘चेल्सीमा आउन पाउँदा म निकै खुसी छु । जब मैले मेरो नजिकका साथी एडु (मेन्डी) र जोर्जिन्होसँग छलफल गरें । मलाई निर्णय लिन झनै सहज भयो,’ उनले प्रष्ट पारे ।

चेल्सीका मालिक बोहलीले कौलीबालीलाई भित्र्याउन पाउँदा हर्षित भएको बताए । ‘कौलीबाली विश्वका सर्वश्रेष्ठ डिफेन्डरमा पर्छन् । म उनलाई चेल्सीमा स्वागत गर्न पाउँदा हर्षित छु । उनी राम्रो खेलाडी र एक कुशल नेता हुन् । उनको अनुभव र कौशलले हामीलाई धेरै फाइदा पुग्नेछ,’ उनले भने ।