एजेन्सी – सुरुवाती दुई गोलको अग्रता जोगाउन नसक्दा म्यानचेस्टर युनाइटेड प्रि–सिजनको मैत्रीपूर्ण खेलमा प्रिमियर लिग प्रतिद्वन्द्वी एस्टन भिल्लासँग बराबरीमा रोकिएको छ ।

अन्तिम समयमा गोल खान पुगेपछि युनाइटेड एस्टन भिल्लासँग २–२ गोलको बराबरीमा रोकिन बाध्य बनेको हो । अप्टस स्टेडियम पर्थ अष्ट्रेलियामा शनिबार भएको खेलमा युनाइटेडका लागि जेडान सान्चोले गोल गर्दा एक गोल उपहार पाएको थियो । भिल्लाका लिओन बेली र क्यालम चेम्वर्सले बराबरी गोल फर्काए ।

खेलको २५औं मिनेटमा जेडान सान्चोको गोलबाट शुरुवाती अग्रता लिएको थियो । ४२औं मिनेटमा म्याटी क्यासले आत्मघाती गोल गरेपछि युनाइटेड पहिलो हाफमा २–० ले अघि बढ्यो । तर त्यो अग्रतालाई युनाइटेडले दोस्रो हाफमा जोगाउन सकेन ।

५०औं मिनेटमा लिओन बेलीले गोल गर्दै भिल्लालाई खेलमा फर्कने संकेत दिए । त्यसपपछि हारतर्फ अग्रसर भिल्लालाई क्यालम चेम्वर्सले गोल गर्दै टोलीलाई हारबाट जोगाउँदा युनाइटेडलाई जितबाट वञ्चित गराए ।

प्रि–सिजनमा युनाइटेडको यो पहिलो बराबरी हो । यसअघि युनाइटेडले लगातार तेस्रो जित निकाल्दा लिभरपुल, मेलवर्न भिक्टोरी र क्रिस्टल प्यालेसलाई हराएको थियो ।

प्रि–सिजनमा भिल्लाको पनि यो पहिलो बराबरी हो । यसअघि भिल्लाले वालसल, लिड्स युनाइटेड र ब्रिसबेन रोअर एफसीलाई हराएको थियो ।