एजेन्सी – अमेरिकाको लास भेगासमा हुन लागेको रियल म्याड्रिड र बार्सिलोना बिचको मैत्रीपूर्ण खेलका लागि दुवै टोलीको सुरुवाती ११ घोषणा भएको छ । खेल नेपाली समयअनुसार विहान ८:४५ बजे सुरु हुनेछ ।

बार्सिलोनाले आफ्नो बलियो टोली उतार्दा रियलले भने मुख्य खेलाडी करीम बेन्जेमालाई विश्राम दिएको छ । बार्सिलोनाले यसै ट्रान्सफर विन्डोमा क्लब आएका फरवार्डद्वय रोबर्ट लेवान्डोस्की र राफिन्हालाई पहिलो रोजाइमा नै खेलाएको छ । लेवान्डोस्कीको बार्सिलोनाबाट यो डेब्यु खेल पनि हो ।

बार्सिलोनाले गोलरक्षकमा मार्क आन्दर टेर स्टेगन उतारेको छ । डिफेन्सको जिम्मेवारी रोनाल्ड अराउजो, आन्द्रिएस क्रिस्टेन्सन,जोर्डी अल्बा र एरिक गार्सियाले सम्हाल्नेछन् । मिडफिल्डमा सर्जियो बुस्केट्स, पेड्री र गाभी रहनेछन् । आक्रमणमा अन्सु फातीले दुई नयाँ खेलाडीलाई साथ दिनेछन् ।

यता रियल म्याड्रिडले भने बेन्जेमालाई विश्राम दिँदा दुवै नयाँ खेलाडी एन्टोनियो रुडीगर र औरेलिएन चुआमेनीलाई उतारेको छ । रियलको गोलरक्षकमा थिबाउट कोर्टुवा छन् । डिफेन्समा रुडीगर, एडर मिलिसाओ, डेविड अलावा र लुकास भाज्केज छन् । मिडफिल्डमा फेडे भालभर्डे, एदुआर्डो कामाभिंगा र चुआमेनी खेल्नेछन् । आक्रमणमा भिनिसियस जुनियर, इडेन हाजार्ड र रोड्रीगो रहेका छन् ।