एजेन्सी – पेरिस सेन्ट जर्मेन (पिएसजी) मा नेयमारको भविष्य अझै रहस्यमय नै रहेको बताइन्छ । प्रि सिजनका लागि जापानमा रहेको पिसएजीले रेड डायमण्डलाई ३–० ले पराजित गरेपछि नेयमारले भने आफू क्लबमै रहन चाहेको बताएका छन् ।

नेयमारले आफ्नो चाहना क्लबमै रहने बताइरहँदा पिएसजीका प्रशिक्षक क्रिस्टोफ गाल्तिएरले भने उनको स्थिति प्रष्ट पार्न चाहेनन् । प्रि सिजनको अन्तिम खेलपछि पिएसजका प्रशिक्षक गाल्तिएरले आफूलाई नेयमारका विषयमा जानकारी नभएको बताएका छन् ।

उनले भने ‘मैले पत्रकार सम्मेलनमा पनि यसबारे बोलेको थिएँ । उनका बारेमा अहिले केही भन्न सक्दिन । भविष्यमा के हुन्छ भन्ने अहिले भन्न सकिन्न । त्यसका लागि ट्रान्सफर बजारको अन्त्यसम्म कुर्नुपर्ने हुन्छ । मलाई यो बारेमा थाहा छैन ।’

प्रशिक्षक गाल्तिएरले नेयमारका बारेमा दुविधा रहेको बताए । ‘हामीले भन्यौं उनले छाड्नेछन् । फेरि हामीले भन्यौं उनी बस्नेछन् । उनीसँग यो विषयमा मेरो व्यक्तिगत छलफल भएको छैन,’ गाल्तिएर थपे,‘तर ती सबै विषयले उनको प्रशिक्षणमा केहि फरक परेको छैन । उनी अभ्यासमा रमाइरहेका छन् ।’

नेयमार बस्न चाहन्छन्

बार्सिलोनाका पूर्व स्टार नेयमारले आफू पिएसजीमै रहन चाहेको प्रष्ट पारेका छन् । नेयमारले सरुवाका विषयमा क्लबले आफूसँग कुनै चर्चा नगरेको पनि बताएका छन् ।

‘म अझै यहि बस्न चाहन्छु । यो विषयमा क्लबले मलाई केहि भनेको छैन । मेरो विषयमा क्लबको के योजना छ त्यो थाहा छैन’, उनले भने । त्यसअर्थ पनि नेयमारको सरुवा सम्भावना भने अझै रहेको अनुमान गरिएको छ । प्रशिक्षकले प्रष्ट रुमा उनलाई नचाहनुले नेयमारलाई अन्य टोलीले चाहेको अवस्थामा जान सक्नेछन् ।