काठमाडौं (हाम्रो खेलकुद) – साफ यू २० च्याम्पियनसिपको पहिलो खेलमा नेपालले माल्दिभ्सविरुद्ध अग्रतालाई २–० बनाएको छ । नेपालका लागि दोस्रो गोल सुगम सुवालले गरेका थिए । उनले ५८ औं मिनेटमा गोल गरेका हुन् । विपक्षी रक्षकहरुलाई छलाउँदै पेनाल्टी बक्सबाट सुगमले दोस्रो बारमा गोल गरेका थिए ।

भारतको भुवनेश्वरमा जारी खेलमा पहिलो हाफको अन्त्यतिर दीपेश गुरुङको गोलबाट नेपालले अग्रता लिएको थियो । ४२ औं मिनेटमा रिबाउन्डमा प्राप्त बलमा दीपेशले गोल गरेका थिए । कप्तान आयुष घलानको फ्रिकिक प्रहारमा आएको बललाई माल्दिभ्सका गोलकिपरले पन्च गरेपछि रिबाउन्डमा आएको बलमा झण्डै २५ यार्डबाट दीपेशले गोल गरेका थिए । लगत्तै नेपालले गोलअन्तर दोब्बर गर्ने मौका पाएको थियो । तर, माल्दिभ्सका रक्षकहरुले सफल हुन दिएनन् । त्यसअघि ३१ औं मिनेटमा सुगम सुवालले गोलका लागि गरेको प्रयास सफल हुन सकेन । उनको प्रहार पोष्ट नजिकबाट बाहिरिएको थियो । गोलकिपर इश्वर गुरुङले दुई पटक गोल हुनबाट रोकेका थिए ।
सिनियर राष्ट्रिय टोलीको समेत अनुभव बटुलिसकेका आयुषको कप्तानीमा नेपाली टोलीले यू २० मा चुनौती प्रस्तुत गरेको छ ।
यसअघि यू–१८ र यू–१९ को नाममा हुँदै आएको च्याम्पियसिप यसपालीदेखि यू–२० को नामबाट हुँदैछ । यसअघि नेपालले सुरुवाती दुई संंस्करण जित्दा पछिल्लो संस्करण भारतले जितेको थियो ।