काठमाडौं (हाम्रो खेलकुद) – साफ यू २० च्याम्पियनसिपको पहिलो खेलमा नेपालले माल्दिभ्सविरुद्ध अग्रतालाई ३–० बनाएको छ । नेपालका लागि तेस्रो गोल क्रितिशरत्न छुन्जुले गरेका छन् । क्रितिशले ६२ औं मिनेटमा पेनाल्टीमा गोल गरेका थिए ।

कप्तान आयुष घलानलाई माल्दिभ्सका खेलाडीले पेनाल्टी बक्समा फाउल गरेपछि नेपालले पेनाल्टी पाएको थियो । त्यसअघि सुगम सुवालले नेपालका लागि दोस्रो गोल गरेका थिए । छनोटका लागि डेनमार्कबाट स्वदेश आएका सुगमले ५८ औं मिनेटमा गोल गरेका हुन् । विपक्षी रक्षकहरुलाई छलाउँदै पेनाल्टी बक्सबाट सुगमले दोस्रो बारमा गोल गरेका थिए ।

भारतको भुवनेश्वरस्थित कालिंगा रंगशालामा जारी खेलमा पहिलो हाफको अन्त्यतिर दीपेश गुरुङको गोलबाट नेपालले अग्रता लिएको थियो । ४२ औं मिनेटमा रिबाउन्डमा प्राप्त बलमा दीपेशले गोल गरेका थिए । कप्तान आयुष घलानको फ्रिकिक प्रहारमा आएको बललाई माल्दिभ्सका गोलकिपरले पन्च गरेपछि रिबाउन्डमा आएको बलमा झण्डै २५ यार्डबाट दीपेशले गोल गरेका थिए ।

लगत्तै नेपालले गोलअन्तर दोब्बर गर्ने मौका पाएको थियो । तर, माल्दिभ्सका रक्षकहरुले सफल हुन दिएनन् । त्यसअघि ३१ औं मिनेटमा सुगम सुवालले गोलका लागि गरेको प्रयास सफल हुन सकेन । उनको प्रहार पोष्ट नजिकबाट बाहिरिएको थियो । गोलकिपर इश्वर गुरुङले दुई पटक गोल हुनबाट रोकेका थिए ।

सिनियर राष्ट्रिय टोलीको समेत अनुभव बटुलिसकेका आयुषको कप्तानीमा नेपाली टोलीले यू २० मा चुनौती प्रस्तुत गरेको छ । यसअघि यू–१८ र यू–१९ को नाममा हुँदै आएको च्याम्पियसिप यसपालीदेखि यू–२० को नामबाट हुँदैछ । यसअघि नेपालले सुरुवाती दुई संंस्करण जित्दा पछिल्लो संस्करण भारतले जितेको थियो ।

साउन ११ गते श्रीलंकासँग प्रतिस्पर्धा गर्ने नेपालले साउन १५ गते आयोजक भारतको सामना गर्र्नेछ । राउन्ड रोविनको अन्तिम खेल नेपालले साउन १७ गते बंगलादेशसँग खेल्नेछ । सहभागी ५ टोलीको राउन्ड रोविन पछि शीर्ष २ टोलीले फाइनल खेल्नेछन् ।