एजेन्सी – इंग्लिस प्रिमियर लिगमा म्यानचेस्टर युनाइटेडले सुरुवाती दुवै खेल हार्दै बिर्सनलायक सुरुवात गरेको छ । पछिल्लो हारपछि त टोलीबारे निकै प्रश्न पनि उठे । यसबीचमा टोलीका स्टार फरवार्ड क्रिस्टियानो रोनाल्डो भने आलोचनाको केन्द्रमा रहेका छन् ।

प्रि-सिजनमा उपस्थित नहुनु र पटक पटक उनको नाम युरोपको अन्य क्लबसँग जोडिनुले पनि रोनाल्डो चर्चामा छन् । त्यसो त सुरुवाती दुवै खेलमा उनको प्रदर्शन खराब रहेको छ । तर प्रशिक्षक एरिक टेन हाग भने रोनाल्डो एक्लैलाई यसको दोष थोपर्न नहुने बताउँछन् । टेन हागले नतिजाको जिम्मेवारी टोलीको हुने र रोनाल्डो अझैपनि आफ्नो योजनामा रहेको बताए ।

‘मलाई थाहा छैन शनिबारको खेलपछि रोनाल्डोलाई लक्षित किन गरिएको छ । त्यो हारको कारण टोलीको प्रदर्शन थियो । पूरा टोली यसको जिम्मेवार छ, रोनाल्डो सहित । अहिलेलाई म रोनाल्डो हाम्रो योजनामा छन् भनेर पुष्टि गर्न सक्छु ।’

म्यानचेस्टर युनाइटेडले सन् १९२१ यता पहिलो पटक लिगको सुरुवाती दुई खेलमा हार बेहोरेको छ । र टोलीले अब सोमबार हुने खेलमा चिर परिचित प्रतिद्वन्द्वी लिभरपुलको सामना गर्दैछ । टेन हागले उक्त खेल जसरि पनि जित्नुपर्ने अवस्था रहेको बताए ।

‘ मलाई दुई क्लबबीच इतिहासबारे थाहा छ । हामीले अब हरेक खेल जित्नुपर्छ । विशेषगरी यो खेल त जित्नैपर्छ । यो मैले राम्रोसँग बुझेको छु ।’

टेन हागले पछिल्लो दुई खेलमा हार बेहोरेपनि टोलीको सिद्धान्त र योजना परिवर्तन नहुने बताए । ‘हरेक खेल फरक हुन्छ । तर हाम्रो खेल्ने सिद्धान्त र योजना त्यस्तै रहन्छ । पछिल्लो खेलबाट हामीले के ठिक छ र के सुधार्नुपर्छ थाहा पाएका छौं । पक्कैपनि धेरै कुरा गलत भएको थियो । यदि तपाईं त्यो बुझ्न सक्नुहुन्छ भने धेरै बोल्न पर्दैन ।’

लिभरपुल र युनाइटेडबीचको खेल सोमबार राती हुनेछ । खेल नेपाली समयअनुसार मंगलबार विहान १२:४५ बजे (सोमबार मध्यरात) मा हुनेछ । यस खेलका लागि लिभरपुलका फरवार्ड डार्विन न्युनेज रातो कार्डका कारण अनुपस्थित रहनेछन् ।