एजेन्सी – सुरुवाती दुई गोलको अग्रता जोगाउन नसक्दा बोरुसिया डर्टमुन्ड जर्मन बुन्डेसलिगामा वेडर ब्रेमेनसँग घरेलु मैदानर्म स्तब्ध बनेको छ ।

अन्तिम समयमा तीन गोल खाएपछि डर्टमुन्ड घरेलु मैदानमा वेडर ब्रेमेनसँग ३–२ ले स्तब्ध बनेको हो । डर्टमुन्डलाई स्तब्ध पार्न ब्रेमेनका लि बुचानान, निक्लस स्मिड र ओलिभर बुर्कीले गोल गरे । डर्टमुन्डका जुलियन ब्रान्ड र राफयल गुरेइरोको गोल सान्त्वना बन्यो ।

सिग्नल इडुना पार्क डर्टमुन्डमा शनिबार राति भएको खेलको पहिलो हाफको अन्त्यतिर जुलियनको गोलबाट डर्टमुन्डले सुरुवाती अग्रता लिएको थियो । उनले कप्तान मार्काे रिउसको पासमा गोल गर्न सफल भएका थिए ।

७७औं मिनेटमा राफयल गुरेइरोले गोल गरेपछि डर्टमुन्ड सहज जिततर्फ अग्रसर बनेको थियो । तर, डर्टमुन्ड अन्तिम समयमा सम्हालिन नसक्दा पहिलो हार बेहोर्न बाध्य बन्यो ।

८९औं मिनेटमा लि बुचानानले गोल गर्दै ब्रेमेनलाई खेलमा फर्कने संकेत दिए । इन्ज्युरी समयको थप गरिएको तेस्रो मिनेटमा निक्लस स्मिडले गोल गर्दै खेललाई २–२ गोलको बराबरीमा ल्याए । त्यसपछि इन्ज्युरी समयको थप गरिएको पाँचौ मिनेटमा ओलिभर बुर्कीले गोल गर्दै डर्टमुन्डलाई घरमै स्तब्ध पार्दै ३ अंक जोड्न सफल भयो ।

डर्टमुन्डको यो तेस्रो खेलमा पहिलो हार हो । यसअसघ डर्टमुन्डले सुरुवाती दुई खेलमा जित निकालेको थियो । डर्टमुन्डको ३ खेलबाट ६ अंक छ । डर्टमुन्डलाई हराएर अपराजित रहेको ब्रेमेनको ३ खेलबाट ५ अंक छ । ब्रेमेनले सुरुवाती दुई खेलमा बराबरीको नतिजा निकालेको थियो ।