एजेन्सी – जर्मन क्लब बोरुसिया डर्टमुन्डका सिइओ हान्स-जोकिम वाट्जकेले पोर्चुगिज फरवार्ड क्रिस्टियानो रोनाल्डो विश्व फुटबलका महान खेलाडी मध्यका एक रहेको बताएका छन् ।

जर्मन मिडियाले रोनाल्डोको बोरुसिया डर्टमुन्ड आउने सम्भावनाबारे सोध्दा वाट्जके रोनाल्डोको तारिफ गरेका हुन् । ‘क्रिस्टियानो रोनाल्डो र बोरुसिया डर्टमुन्ड ? यो निकै राम्रो सुनिन्छ । रोनाल्डो विश्व फुटबलका महान् खेलाडीमा पर्छन्,’ उनले भने, ‘तर दुखको कुरा यो हो की उनी यहाँ आउने छैनन् । हालसम्म हामीले कुनै किसिमको छलफल गरेका छैनौं र यो ट्रान्सफर हुँदैन ।’

रोनाल्डोले यस सिजन च्याम्पियन्स लिग खेल्ने इच्छा जाहेर गरेसँगै डर्टमुन्डको नाम पनि रोनाल्डोसँग जोडिएको हो । युनाइटेड गत सिजन लिगमा छैटौं भएपछि युरोपा लिगमा खुम्चिएको थियो । यता डर्टमुन्ड पनि यसै सिजन अनुबन्ध भएका फरवार्ड सबास्टियन हालरको अनुपस्थितिपछि नयाँ फरवार्ड भित्र्याउन चाहन्छ । आयाक्सबाट आएका हालर क्यान्सर देखिएपछि मैदानबाहिर छन् । उनको उपचार भइरहेको छ ।

डर्टमुन्डका प्रशिक्षक एडिन तेर्जिचले पनि रोनाल्डो आउने चर्चा हल्ला मात्र भएको बताएका छन् । ‘रोनाल्डो आउने हल्ला मात्र हो । क्लबका सिइओले पनि प्रष्ट पारेका छन् र म थप बोल्न चाहन्न,’ उनले भने, ‘रोनाल्डो मैले खेलेको देखेका उत्कृष्ट फुटबलर हुन् ।’