एजेन्सी – जर्मन बुन्डेसलिगामा बायर्न म्युनिखले लगातार तेस्रो जित निकाल्दै आफ्नो शीर्षतालाई कायमै राखेको छ ।घरेलु टोली भिएफएल बोचुमलाई ७–० ले पराजित गर्दै बायर्नले नयाँ सिजनमा लगातार तेस्रो जित निकालेको हो ।

बायर्नको फराकिलो जितमा साडियो मानेले दुई तथा लिरोए साने, म्याथिज डि लेग्ट, किङ्सले कोमान र सर्ज जिनाब्रीले गोल गर्दा एक गोल उपहार पाएको थियो । एक गोल उपहार पाएको थियो । गोलको वर्षा भएको खेलमा बायर्नले पहिलो हाफमा चार तथा दोस्रो हाफमा तीन गोल थपेको थियो ।

आइतबार राति भएको खेलको चौथो मिनेटमा लिरोए सानेको गोलबाट बायर्नले गोलको खाता खोल्यो । २५औं मिनेटमा डि लेग्टले गोल गर्दै बायर्नको अग्रता दोब्बर पारे ।

३३औं मिनेटमा किङ्सले कोमानले गोल गरेपछि बायर्न खेलमा ३–० ले अघि बढ्यो । ४०औं मिनेटमा साडियो मानेले गोल गरेपनि भिएआरबाट मान्यता पाएन । तर त्यसको दुई मिनेटपछि मानेले गोल गर्दै बायर्नलाई पहिलो हाफमा ४–० को आरामदायी अग्रता दिलाए ।

६०औं मिनेटमा साडियो मानेले पेनाल्टीमार्फत व्यक्तिगत दोस्रो तथा टोलीका लागि पाँचौ गोल गरे । ६९औै मिनेटमा क्रिष्टियन गाम्बोआले आत्मघाती गोल गरेपछि बायर्न खेलमा ६–० ले अघि बढ्यो । ७६औं मिनेटमा सर्ज जिनाब्रीले गोल गर्दै बायर्नलाई फराकिलो जित दिलाए ।

बलियो बायर्नविरुद्ध बोचुमले कुनैपनि समय खुलेर खेल्न सकेन । जितसँगै बायर्न ३ खेलबाट ९ अंक जोडेर शीर्षस्थानमा रहेको छ । पराजित बोचुम अंकविहीन हुँदै पुछारमा छ ।