एजेन्सी – इंग्लिस क्लब न्यूक्यासल युनाइटेडले स्पेनिस क्लब रियल सोसिडाडका स्वीडिस फरवार्ड एलेक्साण्डर इसाकलाई क्लबको कीर्तिमानी मुल्यमा अनुबन्ध गरेको छ ।

२२ वर्षीय युवा फरवार्ड इसाकलाई न्यूक्यासलले ६० मिलियन पाउन्डमा लामो समयसम्मको लागि क्लबमा आबद्ध गर्न सफल भएको हो । योसँगै उनी क्लबको सबैभन्दा महँगा खेलाडी बनेका छन् ।

न्युक्यासलको सन् २०१९ मा जर्मन क्लब होफेनहाइनबाट ब्राजिली फरवार्ड–मिडफिल्डर जोलिन्टनका लागि ४० मिलियन पाउण्ड खर्चिएको थियो । जुन क्लबले खर्चिएको कीर्तिमानी रकम थियो ।

क्लबले गत जनवरीमा ब्राजिलियन मिडफिल्डर ब्रुनो गुइमारेसका लागि ३५ मिलियन र प्लस एड–अनहरू पनि भुक्तान गरेपनि न्यूक्यासलका लागि इसाकको हस्ताक्षर महत्वपूर्ण हुनेछ ।

न्यूक्यासलमा अनुबन्ध भएसँगै इसाकले यो आफ्नो लागि ठुलो निर्णयक भएको र यो निर्णयमा आँफु खुशी रहेको बताएका छन् । ‘यो एक महान ऐतिहासिक क्लब हो । म क्लबको परियोजनामा विश्वास गर्छु । म न्यूक्यासलको हिस्सा बन्न चहान्छु ।’ इसाकले भने ।

न्यूक्यासलका मालिकले गत अक्टोबरमा क्लबको जिम्मा लिएपछि क्लब ट्रान्सफर बजारमा निकै सक्रिय बनेको छ । इसाकअघि न्यूक्यासलले यस समरमा म्याट टारगेट, स्वेन बोटम्यान र निक पोपलाई अनुबन्ध गरेको छ ।

जर्मन क्लब बोरुसिया डर्टमुन्डका पूर्व खेलाडी इसाकले सोसिडाडका लागि १३२ खेलमा ४४ र आफ्नो देशका लागि ३७ खेलमा ९ अन्तर्राष्ट्रिय गोल गरेका छन् । उनले यो सिजन रियल सोसिडाडका लागि दुई खेल खेल्दा एक गोल गरिसकेका छन् ।