एजेन्सी – इंग्लिस क्लब वेस्ट ह्याम युनाइटेडले क्लबको कीर्तिमानी मुल्यमा ब्राजिली मिडफिल्डर लुकास पाक्वेटालाई अनुबन्ध गरेको छ ।

वेस्ट ह्यामले २५ वर्षीय अट्याकिङ मिडफिल्डर पाक्वेटालाई ५ वर्षको लागि ५० मिलियन युरोमा फ्रान्सेली क्लब लियोनबाट अनुबन्ध गरेको हो । थप एक वर्ष अवधि लम्ब्याउने सकिने विकल्प पनि रहेको छ ।

पाक्वेटा मिडफिल्ड र आक्रमणमा खेल्न सक्ने क्षमता राख्दछ । ब्राजिलबाट ३३ क्याप जितिसकेका पाक्वेटाले सन् २०१९ मा ब्राजिलले कोपा अमेरिका कप जित्दा टोलीका सदस्य रहेका थिए । पाक्वेटाले रियो दि जेनेरियो, इटालियन क्लब एसी मिलान र लियोनबाट खेलिसकेका छन् ।

‘म यहाँ आउन पाउँदा धेरै खुशी छु । मलाई आशा छ कि यो मेरो लागि अर्काे सुरुवात हो । म यहाँ मेरो समयमा सफल हुनेछु ।’ पाक्वेटाले भने, ‘गत सिजन वेस्ट ह्यामले निकै राम्रो खेलेको थियो । मलाई आशा छ कि मेरो समयमा पनि राम्रो हुनेछ । म वेस्ट ह्यामको जर्सीमा टोलीका साथीहरुसँग क्लब र समर्थकलाई उत्साहित बनाउन मद्दत गर्नेछु ।’

प्रशिक्षक डेभिड मोएसले लुकासलाई क्लबमा स्वागत गर्न पाउँदा खुशी रहेको बताएका छन् । वेस्ट ह्यामको यो समरमा आठौं हस्ताक्षर हो । यसअघि वेस्ट ह्यामले जियान लुका स्कामाका, नाएफ अगुएर्ड, इमर्सन पाल्मेरी, म्याक्सवेल कोर्नेट, थिलो केरहर, अलफन्सो एरिओला र फ्लिा डाउनेसलाई अनुबन्ध गरेको थियो ।

पाक्वेटा ८ वर्षको उमेरमा फ्लेमेंगोमा आबद्ध भएका थिए । १८ वर्षको उमेरमा रियो दि जेनेरियोबाट ब्राजिलको स्टेट लिग जित्दै ब्राजिली सिरी ‘ए’ मा डेब्यु गरे ।पाक्वेटा सन् २०१९ मै इटालियन क्लब एसी मिलानमा आबद्ध भएका थिए । त्यहाँ १८ महिनामा उनले ४४ गोल गरेका छन् । उनी २०२० मा लियोनमा पुगेका थिए । फ्रान्समा दुई सिजनमा ८० खेल खेल्दा उनले २१ गोल र १४ असिस्ट प्रदान गरेका थिए ।