काठमाडौं (हाम्रो खेलकुद) – भारतीय फुटबलको सर्वोच्च निकाय अल इन्डिया फुटबल फेडेरेसन (एआईएफएफ) को निर्वाचनबाट बिजेपी नेता कल्याण चौबे अध्यक्ष बनेका छन् । पूर्व खेलाडी समेत रहेका चौबे ३४ मतमध्य ३३ मत ल्याउँदै अध्यक्ष बने । उनका प्रतिस्पर्धी राष्ट्रिय टोलीका पूर्व कप्तान भाइचुङ भुटियाले १ मत मात्र प्राप्त गरे ।

कोलकाताको मोहन बगान र इस्ट बंगालबाट गोलरक्षकको रुपमा खेलेका चौबेले राष्ट्रिय टोलीमा समेत रहेका थिए । सन् २००० को दशकमा भारतले लगातार साफ च्याम्पियनसिप जित्दा उनी टोलीका सदस्य थिए । राष्ट्रिय टोलीबाट मैदानमा उत्रन नपाएपनि एआइएफएफको चुनाव जित्ने उनी पहिलो पूर्व खेलाडी बने । ४५ वर्षीय चौबे कोलकाताको राजनीतिमा पनि चलेका नाम हुन् । उनले सन् २०१९ मा कृष्णनगर क्षेत्रबाट संसदीय चुनाव लडेपनि पराजित भएका थिए ।

एआइएफएफको चुनावमा भारतको ३४ राज्य फुटबल संघले मतदान गरेका थिए । चुनावअघि नै कमजोर मानिएका भुटियाले १ मत मात्र प्राप्त गरे । उनले मतगणना प्रक्रिया जारी रहँदै स्थल छाडेका थिए । भुटियाले चुनावपछि बोल्दै चौबेको नेतृत्वमा भारतीय फुटबलले अझ राम्रो यात्रा तयार गर्ने आशा व्यक्त गरे ।

गत महिना विश्व फुटबलको सर्वोच्च निकाय फिफाले अदालतको हस्तक्षेपपछि भारतमाथि प्रतिबन्ध लगाएको थियो । तर अदालतले आफूले खटाएको तीन सदस्यीय समिति फिर्ता गरेपछि फिफाले केही दिनमै चुनाव गर्नका लागि निलम्बन फुकुवा गरेको थियो ।

कांग्रेसका सांसद तथा कर्नाटक फुटबल संघका अधयक्ष एनए हरिस उपाध्यक्ष निर्वाचित भए । उनले राजस्थानका मन्वेन्द्र सिंहलाई पराजित गरे । त्यस्तै अरुनांचलका किपा अजयले आन्द्र प्रदेशका गोपालकृष्ण कोसाराजुलाई पछि पार्दै कोषाध्यक्ष पदमा निर्वाचित भए । कार्यसमिति सदस्यमा भने १४ जना निर्विरोध निर्वाचित भए ।