विराटनगर (हाम्रो खेलकुद) – सुरुवातदेखि नै एक खेलाडी कम उतारेको जदाहा भेट्रानले सेमिफाइनलमा मिल्स भेट्रानलाई पराजित गर्दै मुस्ताङ विराट मेगा भेट्रान कपको फाइनलमा स्थान पक्का गरेको छ ।

शुक्रबार विराटनगरको सहिद रंगशालामा मिल्सलाई ३-० ले पराजित गर्दै जदाहाले उपाधि भिडन्तमा स्थान पक्का गरेको हो । जदाहाका लागि सुवास सुब्बा, विमल गुरुङ र सन्तोष श्रेष्ठले १-१ गोल गरे । प्रतियोगिताको नियम अनुसार ५० वर्ष माथिका खेलाडी अपुग भएपछि जदाहाले १० खेलाडीमा सिमित रहेर खेलेको थियो ।

अनुभवी डिफेन्डर संजिव बुढाथोकीको उत्कृष्ट प्रदर्शनमा जदाहाले बल पोसेसनमा पकड जमाउँदै खेल जित्यो । खेलको १२ औं मिनेटमा सुवासको गोलमा जदाहाले अग्रता लियो । सुवासले मिडफिल्डबाट आएको पासमा अफसाइड ट्रयाप बिट गर्दै वन भर्सेस वनको स्थितिमा सुन्दर गोल गरे ।

३७ औं मिनेटमा जदाहाका लागि सन्तोष श्रेष्ठले अग्रता दोब्बर पारे । उनले पेनाल्टी क्षेत्र भित्रबाट निकै कठिन एंगलबाट गरेको प्रहार पोस्टमा लाग्दै गोल भएको थियो । विमलले खेलको ६५ औं मिनेटमा दर्शनीय गोल गर्दै जित सुनिश्चित गरे । उनले पेनाल्टी क्षेत्र बाहिरबाट गरेको शक्तिशाली प्रहार विपक्षी गोलरक्षकले बचाउने कुनै मौका पाएनन् ।

यससँगै जदाहाले अब शनिबार हुने फाइनलमा आयोजक विराट मेघा स्पोर्ट्स एकेडेमी ‘बी’ को सामना गर्नेछ । विहीबार भएको सेमिफाइनलमा आयोजक टोली पराजित भएपनि विजयी टोली सिद्राहाका खेलाडीविरुद्ध प्रोटेस्ट परेको थियो । सिद्राहाका ३०२ को जितमा दुई गोल गरेका हर्क गुरुङको उमेर प्रतियोगिताको नियमभन्दा कम रहेको थाहा भएपछि आयोजकले सिद्राहालाई निष्कासन गरेको हो ।