एजेन्सी – युरोपेली क्लब फुटबलको सबैभन्दा चर्चित युइएफए च्याम्पियन्स लिगको नयाँ सिजन आज (मंगलबार) देखि सुरु हुँदैछ ।

यसपटकको च्याम्पियन्स लिग च्याम्पियन्स लिगको सर्वाधिक गोलकर्ता पोर्चुगिज भेट्रान फरवार्ड क्रिस्टियानो रोनाल्डोविना नै शुरु हुनेछ । रोनाल्डोसम्मिलित इंग्लिस क्लब म्यानचेस्टर युनाइटेड च्याम्पियन्स लिगमा छनोट हुन असफल भएको थियो ।

रोनाल्डोले च्याम्पियन्स लिगमा १४० गोल गरेका छन् । उनीभन्दा पछि फ्रेन्च क्लब पिएसजीका लियोनेल मेस्सी (१२५) रहेका छन् । रोनाल्डो र मेस्सी नै च्याम्पियन्स लिगमा १ सय गोल पूरा गर्ने खेलाडी हुन् ।

आजदेखि सुरु हुने च्याम्पियन्स लिगको समूह चरणको खेलको पहिलो दिन समूह ‘ई’, ‘एफ’, ‘जी’ र ‘एच’ का विभिन्न ८ खेलमा प्रतिस्पर्धा हुँदैछ । जसमा सर्वाधिक १४ पटकको च्याम्पियन तथा साविक विजेता स्पेनिस क्लब रियल म्याड्रिडले स्कटिस क्लब सेल्टिकसँग उसकै मैदानमा प्रतिस्पर्धा गर्दैछ । रियल सुखद नतिजाको लक्ष्यमा छ ।

यही रियलको समूह ‘एफ’ को अर्काे खेलमा जर्मन क्लब आरबी लाइप्जिगले युक्रेनी क्लब साख्तर डोनेसेकसँग खेल्दैछ । समूह ‘ई’ मा क्रोएसिएन क्लब डिनामो जाग्रिवले इंग्लिस क्लब चेल्सीसँग तथा अष्ट्रिय क्लब रेडबुल साल्जवर्गले इटालियन क्लब एसी मिलानसँग खेल्दैछ ।

समूह ‘जी’ मा जर्मन क्लब बोरुसिया डर्टमुन्डले डेनिस क्लब एफसी कोपेनहेगन तथा स्पेनिस क्लब सेभियाले इंग्लिस क्लब म्यानचेस्टर सिटीसँग खेल्दैछ ।

समूह ‘एच’ मा पोर्चुगिज क्लब बेन्फिकाले इजरायली क्लब माकावी हाइफासँग तथा फ्रेन्च क्लब पेरिस सेन्ट जर्मेन (पिएसजी) ले इटालियन क्लब युभेन्ट्ससँग खेल्दैछ ।

च्याम्पियन्स लिगमा आज

समूह ‘ई’ – डिनामो जाग्रिवविरुद्ध चेल्सी (राति १०:३० बजे) र साल्जवर्गविरुद्ध एसी मिलान (राति १२:४५ बजे)

समूह ‘एफ’ – सेल्टिकविरुद्ध रियल म्याड्रिड (राति १२:४५ बजे) र आरबी लाइप्जिगविरुद्ध साख्तर डोनेसेक (राति १२:४५ बजे)

समूह ‘जी’ – डर्टमुन्डविरुद्ध एफसी कोपेनहेगन (राति १०:३० बजे) र सेभियाविरुद्ध म्यानचेस्टर सिटी (राति १२:४५ बजे)

समूह ‘एच’ – बेन्फिकाविरुद्ध माकावी हाइफा (राति १२:४५ बजे) र पिएसजीविरुद्ध युभेन्ट्स (राति १२:४५ बजे)