एजेन्सी – युरोपेली च्याम्पियन्स लिग अन्तर्गत समूह सी को तेस्रो खेलमा क्याटलान क्लब बार्सिलोनाले हार बेहोरेको छ । इन्टर मिलानले घरेलु मैदानमा बार्सिलोनालाई १-० ले पराजित गरेको हो ।

इन्टरका लागि पहिलो हाफको इन्ज्युरी समयमा हाकान चाल्हानोग्लुले गरेको गोल नै निर्णायक सावित भयो । उनले झन्डै २५ यार्ड टाढाबाट गरेको प्रहारलाई गोलरक्षक मार्क आन्दर टेर स्टेगनले बचाउन सकेनन् । उनले झन्डै ५ वर्षपछि च्याम्पियन्स लिगमा गोल गरेका हुन् ।

दोस्रो हाफमा बार्सिलोनाले खेलमा फर्कने अवसर पाएपनि अभागी सावित भयो । ओस्मान डेम्बेलेको शक्तिशाली प्रहार पोस्टमा लाग्यो । त्यस्तै पेड्रीले गोल गरेपनि भिडियो असिस्टेन्ट रेफ्रीले उक्त गोललाई मान्यता दिएन । खेलको अधिकांश समय बार्सिलोनाले बलमा पकडका साथ इन्टरलाई दबाबमा राखेपनि गोल गर्न भने सकेन ।

बार्सिलोनाका प्रशिक्षक जाभीले अर्को साता हुने खेल च्याम्पियन्स लिग भविष्यको लागि निर्णायक हुने बताए । ‘हामीसँग तीन फाइनल खेल बाँकी छन् । हामीले आजको खेल गुमायौं, तर घरेलु मैदानमा दुई खेल बाँकी नै छ,’ उनले भने ।

‘हामीले अझ बढी जोश देखाउनु पर्छ । आज पहिलो हाफ राम्रो खेल्न सकेनौं । हामीले आफ्नो खेलको पनि आत्मलोचना गर्नुपर्छ,’ उनले भने ।

यस हारसँगै समूह सी मा बार्सिलोना तेस्रो स्थानमा झरेको छ । शीर्षस्थानमा बायर्नको ९ अंक तथा दोस्रो स्थानको इन्टरले ६ अंक जोडेको छ । बार्सिलोनाको ३ अंक छ भने पुछारको भिक्टोरिया प्लेजनले अंक जोडेको छैन ।