काठमाडौं (हाम्रो खेलकुद) – राष्ट्रिय फुटबल टोली तथा त्रिभुवन आर्मी क्लबका रक्षक सुमन अर्यालले अष्ट्रेलिया पुगेको केहि दिनमै बुधबार प्रेमिका इशा भण्डारीसँग इन्गेजमेन्ट गरेका छन् । इशाको आफन्त र सुमन साथीभाईहरुको उपस्थितिमा इन्गेजमेन्ट गरेको सुमनले हाम्रो खेलकुद डटकमलाई बताए ।

अखिल नेपाल फुटबल संघ (एन्फा) एकेडेमीका उत्पादन सुमन गत बिहिबार अस्ट्रेलिया पुगेका थिए । एक वर्षदेखि आफूहरु प्रेम सम्बन्धमा रहेको र अर्को वर्ष विवाह गर्ने योजना रहेको सुमनले जानकारी दिए । अध्ययनका लागि इशाा सात महिना अघि अस्ट्रेलिया गएकी हुन् । सुमन नवलपुर विनय त्रिवेणी गाउँपालिकाका स्थायी बासिन्दा र इशा काठमाडौं मंडिखाटारकी हुन् ।

गत असोज ११ गते बंगलादेशविरुद्धको खेलमा राष्ट्रिय टोलीमा रहेका सुमनले कात्तिक ३ गते गण्डकी प्रदेशको पोखरामा सम्पन्न नवौं राष्ट्रिय खेलकुदअन्तर्गत फुटबलको फाइनल खेलेका थिए । सुमनले राष्ट्रिय टोली अघि नेपाली यु १८, १९ र यु २३ बाट पनि खेलिसकेका थिए ।

पाकिस्तानविरुद्ध कात्तिक ३० गते हुने मैत्रीपूर्ण खेलका लागि भने ३० खेलाडीको प्रारम्भिक छनोटमा सुमन सामेल छैनन् । सुमनले केहि समय अस्ट्रेलियामा फुटबल खेल्ने र स्वदेश फर्केने योजना रहेको समेत सुनाए ।