एजेन्सी – फिफा विश्वकप कतार २०२२ सुरु हुन अब दुई साता मात्रै बाँकी छ । यो साता क्लबको खेलपछि खेलाडीहरु आफ्नो देशको प्रतिनिधित्व गर्दै विश्वकप खेल्ने योजनामा छन् ।

खेलाडीहरु आफ्नो देशलाई च्याम्पियन बनाउन चाहन्छन् । तर, सबैले यस्तो सफलता हात पार्न पाउदैनन् । कतिपय ठूला देश विश्वकपमा छनोट नहुँदा विश्व फुटबलका स्टारहरु विश्वकपमा देखिने छैनन् । तर आफ्नो देशलाई विश्वकपमा पुर्याएपनि चोटका कारण खेल्न नपाउने संख्या पनि बढ्दो छ ।

चोटकै कारण खेलाडीहरुले फुटबलको कुम्भमेला विश्वकपसँगै अन्य ठुला प्रतियोगिताहरु गुमाइरहेको इतिहास छ । कतारमा हुने विश्वकपमा पनि केही ठुला नामले चोटकै कारण विश्वकप गुमाउने स्थिति बनेको छ ।

इंग्ल्याण्ड

इंग्ल्यान्डका रिस जेम्स, काल्भिन फिलिप्स, काइल वाकरसँगै बेन चिलवेलले यस विश्वकप गुमाउने सम्भावना छ ।

वेल्स

६४ वर्षपछि विश्वकपमा छनोट भएको वेल्सका ग्यारेथ बेल आफ्नो पहिलो विश्वकप खेल्न फिट हुनुपर्नेछ । यसबाहेक टम लरेन्स र जो एलेन पनि चोटसँग संघर्ष गरिरहेका छन् । डिफेन्डर रेस नोरिङटनले विश्वकप गुमाउने पक्का भइसकेको छ ।

फ्रान्स

डिडियर डेसच्याम्प्सको डिफेन्डिङ च्याम्पियन फ्रान्सबाट यसपटक २०१८ को विश्वकप जित्दाका दुई मख्य मिडफिल्डर टोलीमा हुने छैनन् । एन’गोलो कान्टे र पउल पोग्बाले विश्वकप गुमाउने पक्का भइसकेको छ । वेस्ले फोफानाले पनि खेल्ने सम्भावना सकिदा लुकास हर्नान्डेजले पूनरागमन गर्ने सम्भावना छ । यसबाहेक बोउबाकर कामरा, राफायल भरान र एन्थोनी मार्सियालले पनि खेल्ने सम्भावना कम छ ।

ब्राजिल

ब्राजिल २००२ पछि विश्वकप जित्ने अभियानामा छ । तर, उसका महत्वपूर्ण खेलाडी रिचार्लीसनले विश्वकप खेल्ने सम्भावना न्युन बनेको छ । इंग्लिस क्लब टोटेनहमका फरवार्डले गत अक्टोबरमा एभर्टनमाथि २–० को जित निकालेको खेलमा चोट बोकेका थिए । यस्तै अर्थर मेलोले विश्वकप खेल्ने सम्भावना न्यून छ ।

पोर्चुगल

प्रशिक्षक फर्नान्डो सान्तोस घाना, दक्षिण कोरिया र उरुग्वेविरुद्धको खेलमा आफ्नो चार महत्वपूर्ण खेलाडीबाट वञ्चित हुन सक्नेछन् । डिएगो जोटा, पेड्रो नेटो, पेपे र नुनो मेन्डेस चोटसक्ग संघर्ष गरिरहेका छन् ।

जर्मनी

चार पटकको च्याम्पियन जर्मनीले यस विश्वकपमा आफ्नो प्रमुख फरवार्डलाई गुमाउने भएको छ । टिमो वेर्नर जर्मनीले विश्वकपमा गुमाउने पछिल्ला स्टार हुन् । उनले च्याम्पियन्स लिगमा साखतर डोनेस्कविरुद्धको खेलमा घुँडामा चोट बोकेका थिए ।

३३ वर्षीय मिडफिल्डर मार्को रिउसले पनि विश्वकप गुमाउने सम्भावना छ । चोटबाट पूनरागमन गरेकै खेलमा उनले पुनः चोटक बोकेका छन् । तिघ्रामा चोट बोकेका लिरोए साने प्रशिक्षणमा फर्किएका छन् । काँधको चोटका कारण गोलरक्षक तथा कप्तान म्यानुएल नुएरले पनि पछिल्ला खेल खेलेका छैनन् ।

नेदरल्याण्ड्स

नेदरल्याण्ड्सले पनि अनुभवी मिडफिल्डर गुमाउनेछ । जर्जिनो वाइनाल्डम दायाँ खुट्टा भाँचिएका कारण टोलीमा हुनेछैनन् ।

अर्जेन्टिना

सन् २०१४ को उपविजेता अर्जेन्टिनाले पनि आफ्ना प्रमुख खेलाडी गुमाउनेछन् । पाउलो डिबाला र एन्जल डि मारिया कम्तीमा तीन साता मैदान बाहिर रहँदा विश्वकप गुमाउने सम्भावना छ ।

अमेरिका

डेरिल डाइक र माइल रोबिन्सनले विश्वकप गुमाउने छ ।

मेक्सिको

जेरार्डो मार्टिनोलाई आफ्ना दुई शीर्ष स्टारहरूका बारेमा ठूलो चिन्ता छ, तर उनले आफ्नो फिटनेस प्रमाणित गर्न अन्तिम मिनेटसम्म दुवैलाई दिने बताएका छन् । वल्भ्सका फरावर्ड राउल जिमिनेजले ग्रोइनको चोटका कारण अगस्ट ३१ देखि खेलेका छैनन् । अगस्टमा खुट्टा भाँचिएका कारण विंगर जेसस कोरोना विश्वकप खेल्ने समयमै फिट हुने छैनन् ।

दक्षिण कोरिया

च्याम्पियन्स लिगको समूह चरणको अन्तिम खेल दौरान ह्युङ मिङ सनले अनुहारमा चोट बोक्न पुग्दा उनले विश्वकप गुमाउने सम्भावना छ । उनको अनुहारमा चोट लागेकोले विशेष मास्क लगाएर खेल्ने सम्भावना छ ।

क्रोएसिया

मिडफिल्डर मार्सेलो ब्रोजोभिकले सेप्टेम्बरमा अस्ट्रियाविरुद्ध नेसन्स लिग दौरान तिघ्रामा चोट बोकेयता खेलेका छैनन् । उनी पूनरागमनको तरखरमा छन् ।

पोल्याण्ड

इंग्लिस क्लब ब्राइटनका मिडफिल्डर जाकुब मोडरले गत अप्रिलमा बोकेको चोटका कारण यस विश्वकप खेल्ने छैनन् ।

क्यानडा

क्यानडाका कप्तान एटिबा हचिन्सनले प्रि–सिजनमा हड्डीमा चोट लागेपछि आफ्नो क्लब र राष्ट्रका लागि यो अवधिमा खेलेका छैनन् । तर कतारमा खेल्नको लागि समयमै फिट हुने आशा गरिएको छ ।

उरुग्वे

तिघ्राको मांसपेशीको शल्यक्रियाका कारण रोनाल्ड एराउजोले विश्वकप गुमाउनेछ । उनी कम्तीमा तीन महिना बाहिर रहनेछन् ।

मोरक्को

इमरान लुजाले खुट्टाको चोटका कारण विश्वकप गुमाउनेछन् ।

जापान

हडर्सफिल्ड टाउनका डिफेन्डर युटा नाकायामाले एचिलिसको चोटका कारण बाँकी सिजनको लागि बाहिर भएपछि विश्वकप गुमाउने छन् । जापानले विश्वकपका लागि अन्तिम टोली घोषणा गरिसकेको छ ।