काठमाडौं (हाम्रो खेलकुद) – नेपाल र पाकिस्तानको राष्ट्रिय फुटबल टोलीबीच बुधबार हुने मैत्रीपूर्ण खेलका लागि डिजिटल वालेटमार्फत टिकट किन्न मिल्ने बताइएको छ ।

टिकट विक्रीको जिम्मा पाएको फुटलस भिलेजका निर्देशक थमन भुसालले सोमबार विज्ञप्ती जारी गर्दै खेलको टिकट डिजिटल वालेट कम्पनी खल्ती, इसेवा र आइएमइ पेबाट किन्न सकिने बताएका छन् । दशरथ रंगशालामा खेल बुधबार साँझ ५ः०० बजे सुरु हुने अखिल नेपाल फुटबल संघ (एन्फा) ले यसअघि नै सार्वजनिक गरिसकेको छ ।

एन्फाले भिआइपीतर्फ १ हजार र ५ हजार तथा साधारण तर्फ ५ सय रुपैयाँ टिकट दर तोकिएको छ । ५ हजारका भने ८० वटा टिकट विक्रीमा राखिएको छ । यसअघि असोज ११ गते नेपाल र बंगलादेशबीचको खेलमा पनि ५ हजार दरका ८० वटा टिकट विक्रीमा राखिएको थियो । तर, कुनै पनि दर्शकले त्यो टिकट किनेनन् ।

यसपटक टिकट किन्ने दर्शकमध्ये एक भाग्यशाली दर्शकले कतारमा मंसिर ४ गतेबाट सुरु हुने फिफा विश्वकप फुटबल अन्तर्गत ब्राजिल र क्यामरुनबीचको खेलको टिकट प्राप्त गर्ने एन्फाले यसअघि नै सर्वजनिक गरिसकेको छ । विजेताको छनोट गोलाप्रथाबाट गरिने बताइएको छ ।

नेपालसँगको खेलका लागि पाकिस्तानी टोली सोमबार नेपाल आइसकेको छ । एक खेलका लागि प्रशिक्षक नियुक्त भएका प्रवेश कटुवालले रोहित चन्दको कप्तानीमा २३ सदस्यीय नेपाली टोलीको घोषणा गरिसकेका छन् । असोज ११ गतेको मैत्रीपूर्ण खेलमा नेपालले बंगालदेशलाई ३–० ले हराउँदा अन्जन विष्टले ह्याट्रिक गरेका थिए ।