कतार (हाम्रो खेलकुद) – कप्तान लिओनेल मेस्सीसँगै लौटारो मार्टिनेजले अर्जेन्टिनाका लागि साउदी अरेबियाविरुद्ध आक्रमण सम्हाल्ने भएका छन् । फिफा विश्वकप कतार २०२२ अन्तर्गत समूह सी को पहिलो खेल ३:४५ बजे सुरु हुँदैछ ।

अर्जेन्टिनाले आक्रमणमा मेस्सी र मार्टिनेजसँगै आलेहान्द्रो गोमेज र एन्जल डी मारियालाई पहिलो रोजाइमा राखेको छ । मिडफिल्डमा लिआन्द्रो पारेडेस र रोड्रीगो डे पल रहेका छन् । डिफेन्समा क्रिस्टियन रोमेरो र निकोलस ओटामेन्डी मध्यभागमा छन् । विंगब्याकमा निकोलस टाग्लियाफिको र नाहेल मोलिना रहेका छन् । गोलरक्षक एमिलियानो मार्टिनेज छन् ।

यता साउदीका कप्तान सलमान अल्फराजले आक्रमणमा फेरा लाब्रिकान, सालेम अल्द्वासरी र सालेह अलसहरीलाई सहयोग गर्नेछन् । मिडफिल्डमा अब्दुल्ला अल्माल्की र मोहमद कानो पनि छन् । डिफेन्समा अलि अल्बुलाई, साउद अब्दुलहमिद, यासेर अल्सहरानी र हासान अल्ताम्बक्ति छन् । गोलरक्षक मोहमद अलोवाइस रहेका छन् ।

अर्जेन्टिना लगातार १३ औं पटक विश्वकप खेल्दैछ । हालसम्म १८ पटक विश्वकप खेलिसकेको अर्जेन्टिनाको साउदीसँग भने पहिलो पटक भिड्दैछ । हालसम्म अर्जेन्टिनाले एसियाली राष्ट्रसँग खेलेको सबै ४ खेल जितेको छ । सन् १९७८ र ८६ गरेर दुई पटक विश्वकप उपाधि जितेको अर्जेन्टिना यसपटक छनोटमा अपराजित रहेको थियो ।

अर्जेन्टिना अन्तर्राष्ट्रिय फुटबलमा ३६ खेलयता अपराजित छ । अर्जेन्टिनाले साउदीविरुद्ध खेलमा अंक जोडेको अवस्थामा इटालीको ३७ खेल अपराजित रहेको कीर्तिमान बराबरी गर्नेछ । टोलीका कप्तानी लिओनेल मेस्सी पाँचौ पटक विश्वकप खेल्दा पहिलो पटक उपाधि जित्ने प्रयासमा छन् । उनले हालसम्म विश्वकपमा १९ खेल खेलेका छन्, जुन यस विश्वकपमा सहभागी मध्यमा सर्वाधिक हो ।

अर्जेन्टिनाले विश्वकपको पहिलो खेलमा हार नबेहोरेको ३२ वर्ष भइसकेको छ । सन् १९९० मा क्यामरुनसँग पराजित भएपछि टोलीले पहिलो खेलमा ६ जित र १ बराबरीको नतिजा निकालेको छ ।

साउदी अरबले छैटौं पटक विश्वकप खेल्दैछ । सन् १९९४ देखि २००६ सम्म लगातार खेलेको साउदी त्यसयता भने दुई संस्करणमा छनोट हुन सकेन । सन् २०१८ मा पुनरागमन गरेको टोलीले यसपटक पनि एसियाली छनोट पार गर्यो । छनोटमा साउदीले एक मात्र हार बेहोरेको थियो ।

विश्वकपमा पहिलो पटक भेट भएपनि मैत्रीपूर्ण खेलमा भने यी दुई चार पटक आमनेसामने भएका छन् । अर्जेन्टिनाले २ जित र २ बराबरीको नतिजा निकालेको छ । पछिल्लो पटक सन् २०१२ मा यी दुई टोलीको मैत्रीपूर्ण खेल गोलरहित बराबरीमा सकिएको थियो ।

अर्जेन्टिनाले हालसम्म विश्वकपमा ८१ खेल खेल्दा ४३ जित, १५ बराबरी र २३ हार बेहोरेको छ । साउदीले १६ खेलमा ३ जित, २ बराबरी र ११ हार बेहोरेको छ ।