दिपेन्द्र पोखरेल
धरान – विभागीय टोली एपिएफ क्लब पहिलो पटक फुटबलमा राष्ट्रिय च्याम्पियन बनेको छ । सातौं राष्ट्रिय खेलकुदको अन्तिम दिन शुक्रबार अर्को विभागिय टोली नेपाली सेनाको त्रिभुवन आर्मी क्लबलाई २–० ले हराउँदै एपिएफले स्वर्ण पदक जितेको हो ।
धरानस्थित एन्फा टेक्निकल सेन्टरमा फाइनलमा दुवै गोल अन्जन बिष्टले गरेका थिए । उनले दुवै गोल पहिलो हाफमा गरेका हुन् । दोस्रो हाफमा सेनाले खेलमा पकड जमाए पनि गोल फर्काउन सकने । सेनाका नवयुग श्रेष्ठले पटक पटक गोल गर्ने मौका पाए पनि गोल गर्न सकेनन् । नवयुगले प्रहार गरेको हेड बल पोस्टमा लागेर फर्किदा आर्मी चुकचुकाउन पुगेको थियो ।
त्यस्तै आर्मीका कप्तान भरत खवासले खेलको अन्तिम समयमा गोल गरेपनि रेफ्रीले अफसाईड लिएका थिए । कान्छो विभागिय टोली एपिएफले स्वर्ण जित्दा आर्मीले रजत पदकमा चित्त बुझायो । एपिएफसँगै सेमिफाइनलमा पराजित पुलिसले कांस्य पदक जितेको थियो ।
