हिमाल खरेल, भद्रपुर

विभागीय टोली नेपाल एपिएफ फुटबल क्लब प्रथम मुस्ताङ भद्रपुर झापा गोल्डकपको सेमिफाइनलमा प्रवेश गरेको छ ।

मेची रंगशालामा शुक्रबार भएको खेलमा पाहुना टोली काउवार्न बजार प्रगति संघ, ढाका बंगलादेशलाई सडनडेथमा ९–८ ले पराजित गर्दै एपिएफ अन्तिम चारमा पुगेको हो । निर्धारित ९० मिनेटमा १–१ गोलको बराबरीमा टुंगिएपछि खेल टाइब्रेकर हुँदै सडनडेथमा लम्बिएको थियो ।

सडनडेथमा काउवार्नका औङ गोल गर्न चुकेपछि पराजय बेहोर्नपुग्यो । उनको प्रहारलाई एपिएफका गोलरक्षक एन्जल श्रेष्ठले बचाए । अब एपिएफले फाइनल प्रवेशका लागि आइतबार मछिन्द्र फुटबल क्लबसँग खेल्नेछ ।

खेलमा सुरुवाती अग्रता भने काउवार्न बजार प्रगति संघ, ढाका बंगलादेशले लिएको थियो । २१औं मिनेटमा साएरले गोल गर्दै टोलीलाई सुरुवाती अग्रता दिलाए । उनले पेनाल्टी एरियाबाट गरेको प्रहारले जाली चुमाएको थियो ।

दोस्रो हाफमा आक्रमक बनेको एपिएफले युवराज खड्काको गोलबाट ७२औं मिनेटमा बराबरी गोल गर्न सफल भयो ।काउवार्नका गोलरक्षक कोबिजबाट रिवाउण्ड बललाई उनले गोलमा परिणत गरे ।

एपिएफका गोलरक्षक एन्जल श्रेष्ठ प्लेयर अफ द म्याच घोषित भए । उनले नगद २० हजार पुरस्कार पाए । पुरस्कारको सौजन्य मनोज सुब्बा तथा परिवारले पिता वीरहाङ लिम्बूको स्मृतिमा गरेको हो ।

शनिबारको पहिलो सेमिफाइनल खेल संकटा क्लब र त्रिभुवन आर्मी फुटबल क्लबबीच हुने आयोजकले जनाएको छ ।गोल्डकपको विजेता टोलीले नगद १३ लाख र उपविजेताले नगद ७ लाख रुपैयाँ पाउने आयोजक समितिका अध्यक्ष दिपेश ढकालले जानकारी दिए ।

प्रतियोगिताको प्रत्येक खेलको प्लेयर अफ द म्याचले नगद २० हजार पाउनेछन् । उत्कृष्ट गोलरक्षक, उच्च गोलकर्ता, उदयमान खेलाडी, उत्कृष्ट डिफेन्डर, उत्कृष्ट मिडफिल्डर, उत्कृष्ट फरवार्ड, फाइनल खेलको पहिलो गोलकर्ता र प्रशिक्षकलाई २५ हजार दिइने आयोजकले जनाएको छ । प्रतियोगिताको सर्वोत्कृष्ट खेलाडीलाई एक लाख रुपैयाँ दिइने आयोजकले जानकारी दिएको छ ।