काठमाडौं (हाम्रो खेलकुद) – आयोजक केपी ओली फुटबल क्लब केपी ओली कप राष्ट्रिय फुटबल च्याम्पियनसिपको सेमिफाइनलमा प्रवेश गरेको छ ।

‘ए’ डिभिजनको जावलाखेल युथ क्लबलाई टाइब्रेकरमा ५–४ ले पराजित गर्दै आयोजक अन्तिम चारमा पुगेको हो । एन्फा कम्प्लेक्स सातदोबाटोको कृतिम मैदानमा शनिबार भएको खेलको निर्धारित समय १–१ गोलको बराबरीपछि खेल पेनाल्टीमा लम्बिएको थियो ।

पेनाल्टीमा केपी ओली एफसीका कप्तान विक्रम लामा, आदित्य शाक्य, अशोक खवास, लाकेन लिम्बु, र अनिल महर्जनले गोल गरे । जावलाखेलका सिमन्त थापा, समिराज थोकर, फोडे फोफाना र अब्दुलाजिज निशोनबोइभले गोल गर्दा एन्कोटो स्यानोउस मासोआवीको पेनाल्टीलाइ पूर्ण चेम्जोङले बचाउँदै टोलीलाई अन्तिम चारमा पु¥याए ।

त्यसअघि खेलको ४२औं मिनेटमा राहुलले गोल गर्दै जावलाखेललाई सुरुआती अग्रता दिलाएका थिए । ६८औं मिनेटमा अजयी मार्टिन्सले गोल गर्दै खेललाई १–१ गोलको बराबरीमा ल्याए । त्यसपछि थप गोल निस्कन नसक्दा खेल पेनाल्टीमा लम्बियो । जसमा आयोजकले बाजी मार्न सफल भयो ।

अब आयोजक केपी ओली एफसीले सेमिफाइनलमा मछिन्द्र फुटबल क्लबसँग प्रतिस्पर्धा गर्नेछ । राष्ट्रिय युवा संघ नेपालले आयोजना गरेको प्रतियोगितामा आठ टोलीको सहभागिता रहेको छ । प्रतियोगिताको विजेताले उपाधिसहित १० लाख नगद तथा उपविजेताले ५ लाख नगद प्राप्त गर्ने आयोजकले जनाएको छ ।

प्रतियोगिताका सर्बोत्कृष्ट खेलाडीले १ लाख नगद पाउने छन् । त्यसैगरी उत्कृष्ट गोलरक्षक, उत्कृष्ट गोलकर्ता र उदयमान खेलाडीले ५० हजार पाउने छन् ।