काठमाडौं (हाम्रो खेलकुद) – अखिल नेपाल फुटबल संघ (एन्फा) ले नेपाल एपिएफ फुटबल क्लबलाई राष्ट्रिय महिला लिग २०७८ को विजेता घोषित गरेको छ । एन्फा केन्द्रिय कार्यसमितिको बुधबार बसेको चौथो बैठकले लिगको शीर्षस्थानमा रहेको एपिएफलाई विजेता घोषणा गर्ने निर्णय गरेको हो ।

दुई चरणमा गर्ने भनिएको लिगको पहिलो चरण चितवनमा सम्पन्न भएको थियो । अर्को चरण विराटनगरमा आयोजना गर्ने भनिएपनि आयोजना हुन सकेको थिए । पहिलो चरणको समाप्तीमा एपिएफ शीर्षस्थानमा थियो । नेपाल पुलिस क्लब दोस्रो तथा त्रिभुवन आर्मी फुटबल क्लब तेस्रो भएको छ ।

विजेता बनेसँगै एपिएफले उपाधिसहित ७ लाख रुपैयाँ प्राप्त गर्नेछ । दोस्रो भएको पुलिसले ५ लाख रुपैयाँ तथा तेस्रो भएको आर्मीले ३ लाख प्राप्त गर्नेछ । चितवनको शारदानगर फुटबल मैदानमा पहिलो राउण्ड २०७८ चैत १३ गते सम्पन्न भएको थियो ।

एन्फा कार्यसमितिको बैठक विवादित बनेका कारण निर्णय कार्यान्वयन हुने नहुनेमा शंका देखिएको छ । तीन उपाध्यक्षसहितका असन्तुष्ट पक्षले बैठक वहिष्कार गरेपनि एन्फाले विभिन्न निर्णय गरेको आफ्नो वेबसाइटमार्फत जानकारी गराएको छ । असन्तुष्ट पक्षले आफूहरुको बहुमत रहेको दाबी गरेको छ भने एन्फा अध्यक्ष पंकज विक्रम नेम्बाङले बहुमतका आधारमा निर्णय गरेको दाबी गरेका छन् ।