काठमाडौं (हाम्रो खेलकुद) – क्यामरुनी फरवार्ड मेसुके ओलोमोउले दुई गोल गरेपछि एफसी खुमलटारले सहिद स्मारक ‘ए’ डिभिजन लिगमा मनाङ–मर्स्याङ्दी क्लबमाथि रोमाञ्चक जित निकालेको छ ।

खुमलटारले मनाङमाथि २–१ को रोमाञ्चक जित निकालेको हो । खेलमा एक पेनाल्टी चुकाउँदा मनाङ जितबाट वञ्चित बन्यो । कोफी टिमोथी कोडुले पेनाल्टीमा एक गोल गर्दा अर्काे गोल चुकाएपछि मनाङ पराजित हुन पुग्यो ।

त्रिपुरेश्वरस्थित दशरथ रंगशालामा शनिबार भएको खेलको १३औं मिनेटमा मेसुके ओलोमोउले गोल गर्दै खुमलटारलाई १–० को अग्रता दिलाए ।

५३औं मिनेटमा टिमोथी कोडुले पेनाल्टीमा गोल गर्दै मनाङलाई १–१ गोलको बराबरीमा ल्याए । ६१औं मिनेटमा टिमोथी कोडु पेनाल्टीमा चुक्दा मनाङ अग्रता लिनबाट चुक्यो ।

पेनाल्टी बक्समा अभिषेक बर्माले रन्दिप पौडेललाई फउल गरेपछि रेफ्री श्याम दनुवारले मनाङलाई पेनाल्टी प्रदान गर्दा टिमोथीको पेनाल्टी बारबाट थोरै बाहिरियो । इन्ज्युरी समयको थप गरिएको पाँचौं मिनेटमा मेसुकेले व्यक्तिगत र टोलीका लागि दोस्रो गोल गर्दै मनाङलाई हार चखाए ।

मनाङको यो लगातार चौथो हार हो । यसअघि मनाङ सातदोबाटो, जावलाखेल र आर्मीसँग पराजित भएको थियो । यस जितसँगै खुमलटारले ११ खेलबाट १३ अंक जोडेको छ । पराजित मनाङको ११ खेलबाट १५ अंक छ ।