काठमाडौं (हाम्रो खेलकुद) – नेपाली टोलीले एएफसी यू–१७ महिला एसियन कप छनोटमा भाग लिएर आइतबार स्वदेश फर्केको अखिल नेपाल फुटबल संघ (एन्फा) ले जनाएको छ ।

एन्फाकी सदस्य तथा महिला समितिकी संयोजक सरिला श्रेष्ठ र महिला समितिकी सदस्य विन्द्र देवानले त्रिभुवन अन्तर्राष्ट्रिय विमानस्थलमा टोलीको स्वागत गरेका थिए । जोर्डनमा शुक्रबार भएको छनोटको आफ्नो दोस्रो खेलमा आयोजक टोलीलाई नेपालले ४–१ ले हराउँदै अघिल्लो चरण पुग्ने सम्भावनालाई जीवित राखेको थियो ।

जोर्डनविरुद्ध टोलीलाई जित दिलाउन सुक्रिया मियाले २ तथा वर्षा ओली र माया मास्केले समान १ गोल गरेका थिए । मायाले पेनाल्टीमा गोल गरेकी थिइन् । समूह एचमा इरान रहेको छ । पहिलो खेलमा नेपाल इरानसँग १–० ले पराजित भएको थियो । इरान र जोर्डनबीच आज समूहको अन्तिम खेल हुनेछ । नेपाल र इरानको समान ३ अंक छ भने जोर्डनले अंक जोड्न सकेको छैन ।

समूहको शीर्ष टोली अन्तिम चरणमा पुग्नेछ । नेपाली टोली आफ्नो दुबै खेलेपछि स्वदेश फर्केको हो । आज हुने खेलमा जोर्डन विजयी भएको अवस्थामा मात्र नेपालको अघिल्लो चरणको सम्भावना बाँकी रहनेछ । यदि इरान जितेको अवस्था वा बराबरी भएको अवस्थामा टोली अघि बढ्ने छ भने जोर्डनसँगै नेपाल बाहिरिनेछ ।