काठमाडौं (हाम्रो खेलकुद)– नेपाली राष्ट्रिय महिला फुटबल टोलीका दुई मिडफिल्डर सरु लिम्बु र रेनुका नगरकोटे सम्मिलित किकस्टार एफसी कर्नाटकले भारतीय महिला लिग (आईडब्ल्यूएल) मा दोस्रो खेलमा पहिलो जित हासिल गरेको छ ।

गुजरातको अहमावादस्थित आइतबार भएको खेलमा किकस्टारले ओडिसा एफसीलाई २–० गोल अन्तरले हराएको हो । ३६ औं मिनेटमा किओको एलिजावेथ कटुङ्वाले गोलमा किकस्टारले अग्रता लिएको थियो । ७३औं मिनेटमा लेशराम बिबिचा देवीले गोल गरेकी थिइन् ।

सरु पहिलो रोजाईमै खेलेकी थिइन् । रेनुका इन्ज्युरी समयमा मैदान प्रवेश गरेकी थिइन् । अघिल्लो खेलमा किकस्टार इस्टर्न स्पोर्टिङ युनियनसँग १–० ले पराजित भएको थियो ।समूह बीमा इस्टर्न ६ अंकसहित शीर्षस्थानमा छ । किकस्टार ३ अंकसहित पाँचौं स्थानमा छ । राष्ट्रियब टोलीकी कप्तान एन्जिला तुम्बापो सुब्बा सम्मलित सुथु र अनिता बस्नेत सम्मलित लर्डस् एफए कोचीको पनि १ खेलमा समान ३ अंक छ ।

समूह एमा भने राष्ट्रिय टोलीकी सावित्रा भण्डारी सम्मलित गोकुलम केरेला एफसी ६ अंकका साथ शीर्षस्थानमा रहेको छ । सावित्राले गोकुलमको पहिलो जितमा ५ र दोस्रो जितमा ४ गोल गरेकी थिइन् । लिगमा समावेश १६ टोलीलाई दुई समूहमा विभाजन गरि राउन्ड रोविन लिगका आधारमा प्रतियोगिता भइरहेको छ । यसपटक भारतीय लिगमा नेपाली राष्ट्रिय टोलीका ६ खेलाडी सुरु र रेनुका एउटै र बाँकी अलग अलग क्लबबाट खेलिरहेका छन् ।