एजेन्सी – फ्रेन्च लिग वानको शीर्षस्थानमा रहेको पेरिस सेन्ट जर्मेन (पिएसजी) घरेलु मैदानमा लोरिएन्टसँग पराजित भएको छ ।

१० खेलाडीमा समेटिएको पिएसजी घरेलु मैदानमा लोरिएन्टसँग ३–१ ले पराजित भएको हो । लोरिएन्टका एन्जो लि फि, डारलाइन योङ्वा र एहमाडोउ बम्वा डिइङले गोल गरे । पिएसजीका केलियन एमबाप्पेले गोल गरेपनि हार टार्न सकेन ।

पार्क डेस प्रिन्सेस पेरिसमा आइतबार राति भएको खेलको १५औं मिनेटमा एन्जो लि फिको गोलबाट पिएसजी खेलमा पछि पर्यो । खेलमा पछि परिसकेको पिएसजी २०औं मिनेटमा १० खेलाडीमा समेनि पुग्दा थप समस्यामा पर्यो ।

डिफेन्डर अचरफ हाकिमी १५ मिनेटको अन्तरमा दोहोरो पहेलो कार्ड खाँदै मैदानबाट बाहिरिएपछि पिएसजी दवावमा आएको थियो । तर, २९औं मिनेटमा एमबाप्पेले गोल गर्दै खेललाई १–१ गोलको बराबरीमा ल्याए ।

३९औं मिनेटमा डारलाइन योङ्वाले गोल गरेपछि लोरिएन्ट पहिला हाफमा २–१ ले अघि बढ्यो । ८८औं मिनेटमा एहमाडोउ बम्वा डिइङले गोल गर्दै पिएसजीलाई स्तब्ध पारे । त्यसअघि ८६औं मिनेटमा उनको गोलले मान्यता पाएन ।

यस हारपछि पनि शीर्षस्थानमा रहेको पिएसजीको ३३ खेलबाट ७५ अंक छ । टोली दोस्रो स्थानको मार्सेभन्दा ५ अंकले मात्रै अघि छ । पिएसजीलाई हराएको लोरिएन्ट ३३ खेलबाट ४८ अंक जोडेर १०औं स्थानमा छ ।