काठमाडौं (हाम्रो खेलकुद) – विदेशी डिफेन्डर एडमा डोम्वियाले गोल गरेपछि विभागी नेपाल एपिएफ फुटबल क्लब सहिद स्मारक ‘ए’ डिभिजन लिगमा हारबाट बचेको छ ।

एक गोलले पछि परेको स्थितिमा एडमाले गोल गरेपछि एपिएफले न्युरोड टिम (एनआरटी) सँग १–१ गोलको बराबरी खेल्दै अंक खोस्न सफल भएको हो ।

एन्फा कम्लेक्समा बिहीबार भएको खेलमा अन्तिम समयमा सम्हालिन नसक्दा एनआरटी जितबाट वञ्चित बन्यो । प्रतिस्पर्धात्मक र रोमाञ्चक बनेको खेलको पहिलो हाफ गोलरहित बराबरीमा टुंगिएको थियो ।

५९औं मिनेटमा लालनुन्जामाले गोल गर्दै एनआरटीलाई १–० को अग्रता दिलाए । कप्तान विक्रम धिमालको क्रसमा अनमार्क रहेका उनले हेडरमार्फत गोल गर्न सफल भएका थिए । तर, एनआरटीले त्यो अग्रतालाई अन्तिम समयमा जोगाउन सकेन ।

इन्ज्युरी समयको थप गरिएको नवौं मिनेटमा एडमाले गोल गर्दै एपिएफलाई हारबाट जोगाए । सनिश श्रेष्ठको क्रसमा अनमार्क रहेका एडमाले हेडरमार्फत नै बराबरी गोल फर्काउन सफल भएका थिए ।

त्यसको एक मिनेटपछि एनआरटी १० खेलाडीमा समेटिन पुग्यो । गौरव श्रेष्ठ दोहोरो पहेलो कार्ड खाँदै मैदानबाट बाहिरिए । फउलको विषयमा रेफ्रीसँग प्रतिवाद गरेपछि पहिलो हाफकै पहेलो कार्ड खाएका गौरवलाई रेफ्री प्रकाश नाथ श्रेष्ठले उनलाई अर्काे पहेलो काडै देखाउँदै मैदानबाट बाहिर पठाए ।

यस बराबरीसँगै एपिएफ १४ खेलबाट १९ अंक जोडेर सातौं स्थानमा उक्लिएको छ । एनआरटी समान खेलबाटै १७ अंक जोडेर नवौं स्थानमा छ ।