ब्राजिलको सानदार जित

एजेन्सी – अन्तर्राष्ट्रिय मैत्रीपूर्ण खेलमा ब्राजिलले सानदार जित दर्ता गरेको छ । ब्राजिलले अफ्रिकी राष्ट्र गिनियामाथि ४–१ को सानदार जित दर्ता गरेको हो ।

ब्राजिलको फराकिलो जितमा जोइलिन्टन, रोड्रिगो, एडर मिलिसाओ र भिनिसियस जुनियरले गोल गरे । गिनियाका सेरोउ गुइरासीले एक गोल फर्काए ।

आरसीडिइ स्टेडियम स्पेनमा गोलको वर्षा भएको खेलको २७औं मिनेटमा जोइलिन्टनले गोल गर्दै ब्राजिललाई १–० को अग्रता दिलाए । ब्राजिलका लागि डेब्यु गरिरहेका जोइलिन्टनले डेब्युमै गोल गर्न २७ मिनेट मात्रै लाग्यो । ३०औं मिनेटमा रोड्रिगोले गोल गर्दै ब्राजिलको अग्रता दोब्बर पारे ।

३६औं मिनेटमा सेरोउ गुइरासीले इसिएगा स्यालाको पासमा गोल गर्दै खेललाई पहिलो हाफमा २–१ को स्थितिमा ल्याए । ४७औं मिनेटमा मिलिसाओले लुकास पाक्वेटाको पासमा गोल गर्दै ब्राजिललाई सहज जिततर्फ अघि बढाए ।

त्यसपछि ८८औं मिनेटमा भिनिसियस जुनियरले पेनाल्टीमा गोल गर्दै ब्राजिललाई ४–१ को सानदार जित दिलाए । पेनाल्टी बक्समा स्यालाले माल्कोमलाई फउल गरेपछि प्राप्त पेनाल्टीमा भिनिसियस चुकेनन् ।