एजेन्सी – फ्रान्सेली च्याम्पियन पेरिस सेन्ट जर्मेन (पिएसजी) का अध्यक्ष नासेर अल खलिफीले स्टार फरवार्ड किलीयन एमबाप्पे नयाँ सम्झौता गरेमात्र क्लबमा बस्ने बताएका छन् ।

प्रशिक्षक लुइस एनरिकेलाई क्लबमा स्वागत गर्न आयोजित पत्रकार सम्मेलनमा अध्यक्ष खलिफीले एमबाप्पेको अवस्थाबारे प्रष्ट पारेका हुन् । २४ वर्षीय फरवार्डको सम्झौता यसै सिजन सकिँदैछ । तर क्लबले उनलाई नयाँ सम्झौता प्रस्ताव गर्दै अझ लामो समय राख्न चाहन्छ ।

एमबाप्पेको हालको सम्झौतामा उनको बसाइ अझ एक वर्ष लम्ब्याउने विकल्प पनि छ । तर उनी यो सिजन पिएसजीबाट खेलेर अर्को सिजन फ्री एजेन्टको रुपमा फुकुवा हुन चाहन्छन् । पिएसजीले भने उनी क्लब छाड्न चाहेको अवस्थामा ट्रान्सफर रकम आर्जन गर्ने हिसाबले नवीकरणको लागि प्रस्ताव गरिरहेको छ ।

खलिफीले एमबाप्पेले यस सिजन खेल्ने हो भने सम्झौता थप्नुपर्ने बताए । ‘हाम्रो योजना प्रष्ट छ । यदि किलीयन बस्न चाहन्छन् भने उनले नयाँ सम्झौता गर्नुपर्छ । हामी विश्वका उत्कृष्ट खेलाडीलाई अर्को सिजन सित्तैमा गुमाउन चाहदैनौं,’ खलिफीले थपे ।

एमबाप्पे सन् २०१७ मा मोनाकोबाट पिएसजी आएका थिए । उनले हालसम्म क्लबका लागि २ सय ६० खेलमा २ सय १२ गोल गरिसकेका छन् । उनी पछिल्लो ५ सिजन लिगको सर्वाधिक गोलकर्ता बन्दा क्लबले पछिल्ला ६ मध्य ५ लिग उपाधि जितेको छ ।