एजेन्सी – लन्डन क्लब आर्सनलले इंग्लिस प्रिमियर लिग अन्तर्गत शनिबार फुल्हमसँग २-२ को बराबरी खेलेको छ । घरेलु मैदानमा आर्सनल सुरुवातमा पछि परेको अवस्थाबाट पुनरागमन गरेपनि जित दर्ता गर्न भने सकेन ।

खेलको पहिलो मिनेटमा आन्द्रियास परेराले गोल गर्दै फूलहमलाई अग्रता दिलाए । उनले गोलरक्षक पोजिसनमा नरहेको अवस्थामा पेनाल्टी क्षेत्र बाहिरबाट गोल गरेका थिए । त्यसपछि खेलमा पकड जमाएपनि आर्सनललाई खेलमा गोल गर्न दोस्रो हाफ कुर्नुपरेको थियो ।

टेटेले फाबियो भिएरालाई पेनाल्टी क्षेत्रभित्र लडाएपछि आर्सनलले पेनाल्टी मार्फत अग्रता लिने मौका पाएको थियो । बुकायो साकाले त्यसको सदुपयोग गर्दै खेललाई बराबरीमा ल्याए । त्यसको दुई मिनेट पछि भिएराको असिस्टमा एडी एन्केटियाले गोल गर्दै खेलमा आर्सनललाई अग्रता दिलाएका थिए ।

८३औं मिनेटमा फुलहमका क्यालभिन बास्सी दोहोरो पहेंलो कार्ड पाउँदै मैदान बाट बाहिरिएका थिए । तर त्यसले फुलहमलाई बराबरी गर्नबाट रोकेन । ८७औं मिनेटमा जोआओ पाल्हिन्याले गोल गर्दै खेल बराबरीमा ल्याए । उनले ह्यारीसन् रिडको असिस्टमा गोल गरेका थिए ।

आर्सनलले तीन खेलमा हारबिहिन रहँदै सात अंक जोडेको छ भने फुलहमको तीन खेलमा चार अंक पुगेको छ ।

आजै भएको अर्को खेलमा म्यानचेस्टर युनाइटेडले चौथो मिनेटमा २-० ले पछि रहेको स्थितिबाट फर्कंदै जित हासिल गर्यो ।

वुल्भ्सले एभर्टनलाई ८७औं मिनेटमा एकमात्र गोल गर्दै हरायो । सासा कालाजेजीचले गोल गर्दै वुल्भ्सलाई तीन अंक दिलाएका हुन् । वुल्भ्सले सिजनको पहिलो अंक जोड्दा एभर्टन भने अंकविहिन रहेको छ।

आज भएको पाँचौं खेल्न ब्रेन्टफर्ड र क्रिस्टल प्यालेसले १-१ गोलको बराबरी गर्दै अंक बाँडे । ब्रेन्टफर्डका लागि केभिन शाडले गोल गरे भने प्यालेसको लागि ज्वाकीम एन्डरसनले गोल गरे ।

आज भएको पहिलो खेलमा टोटेनहमले बर्नमाउथलाई २-० ले हराएको थियो । आजै राति १०:१५ बजे ब्राइटनले वेस्ट ह्यामको समान गर्दैछ ।