एजेन्सी – दक्षिण कोरियाली फरवार्ड ह्युङ मिन सन र ब्राजिली फरवार्ड रिचार्लीसनको उच्च प्रदर्शनमा टोटेनहम हटस्परले इंग्लिस प्रिमियर लिगमा सानदार जित दर्ता गरेको छ ।

टोटेनहमले घरेलु मैदानमा न्यूक्यासल युनाइटेडमाथि ४–१ को सानदार जित निकालेको हो । टोनहमको जितमा रिचार्लीसनले दुई तथा आइयेनोमा डेस्टिनी युडोगी र समान एक गोल गरे । सनले एक गोलसँगै दुई असिस्ट प्रदान गरे । न्यूक्यासलका जोइलिन्टनले एक गोल फर्काए ।

टोटेनहम हटस्पर स्टेडियम लन्डनमा आइतबार राति भएको एकपक्षीय खेलमा घरेलु टोली टोटेनहमले खेलको २६औं मिनेटमा आइयेनोमा डेस्टिनी युडोगीको गोलबाट अग्रता लिएको थियो । उनले सनको पासलाई सदुपयोग गरे । ३८औं मिनेटमा रिचार्लीसनले सनकै पासमा गोल गर्दै टोटेनहमको अग्रता दोब्बर पारे ।

६०औं मिनेटमा रिचार्लीसनले पेड्रो पोरोको पासमा व्यक्तिगत दोस्रो तथा टोलीका लागि तेस्रो गोल गर्दै टोटेनहमलाई सहज जिततर्फ अघि बढाए । ८५औं मिनेटमा सनले पेनाल्टीमार्फत गोल गर्दै टोटेनहमलाई ४–० को आरामदायी अग्रता दिलाए ।

इन्ज्युरी समयको थप गरिएको पहिलो मिनेटमा जोइलिन्टनले गोल गर्दै खेललाई ४–१ को स्थितिमा ल्याएपनि त्यसपछि थप गोल निस्कन नसक्दा टोटेनहम विजयी हुन सफल भयो ।

यस जितले टोटेनहम १६ खेलबाट ३० अंक जोडेर पाँचौं स्थानमा यथावत छ । पराजित न्यूक्यासल २६ अंक जोडेर सातौं स्थानमा छ ।